Berisha me deputetët konservatorë britanikë, angazhim për të mbështetur PD në zgjedhjet e 11 majit
Vështirësitë e mëdha të krijuara nga keqqeverisja e Edi Ramës, ndikimi i Sorosit në vend, dhe domosdoshmëria e një përmbysje të madhe që do çrrënjosë kalbëzimin e institucioneve, ishin çështje që u diskutuan në takimin që Kryetari i Partisë Demokratike, Sali Berisha, zhvilloi në selinë e PD-së me deputetët konservatorë britanikë, Andrew Rosindell – ministër hije për Marrëdhëniet me Jashtë, Martin Vickers – kryetar i Grupit Parlamentar të Miqësisë Shqipëri-Mbretëri e Bashkuar, Philippa Broom – anëtare e Bordit të Grave Konservatore, dhe Pierre Plumeajau, këshilltar.
Me këtë rast, Sali Berisha informoi deputetët britanikë për përdorimin e drejtësisë si armë kundër kundërshtarit politik, dhe për shpopullimin drastik të vendit si dhe luftën frontale për asgjësimin e opozitës.
Programi i Partisë Demokratike për zgjedhjet e ardhshme do të jetë transformues për Shqipërinë, tha Kryetari i PD ndërsa mirëpriti dëshirën dhe angazhimin e Partisë Konservatore britanike për të mbështetur PD në zgjedhjet e 11 Majit për luftën kundër narkoshtetit dhe rënien e tij.
Vota e diasporës, përfshirë atë në Britaninë e Madhe, tha i bindur Kryetari i Partisë Demokratike, Sali Berisha, në takimin i cili u zhvillua mbrëmjen e së enjtes, do të jetë kyçe për këtë ndryshim në Shqipëri.
Sot, Kryetari i Partisë Demokratike, Sali Berisha, niset sot drejt Gjermanisë ku do të marrë pjesë në Kongresin Elektoral të CDU-së në Gjermani, si përfaqësues zyrtar i opozitës shqiptare.
