Rilindja dhe shteti i së drejtës!
nga Prof.Dr.Enver Bytyçi
Kryeministri Edi Rama çdo ditë përsërit frazën se “Vetëm Partia Socialiste mund të bëjë shtetin e së drejtës”! Kjo është teza e tij verbale. Por çfarë thotë horoskopi i antitezës?
Nëse diskriminimi, presioni, shit-blerja e interesave dhe persekutimi janë drejtësi, atëherë këtë lloj shteti di ta bëjë më së miri Rilindja e Edi Ramës.
Nëse korrupsioni është tipar i së drejtës, atëherë këtë tipar kishte dhe ka shteti i Rilindjes!
Nëse PPP-të janë drejtësi, atëherë këtë lloj privilegji për ortakët e qeverisë di ta bëjë më mirë Rilindja! Madje edhe për porositësit e vrasjeve dhe grabitqarët e territoreve shqiptare!
Nëse burgosja dhe persekutimi i kundërshtarëve politikë është drejtësi, atëherë pikërisht këtë lloj “drejtësie” di ta bëjë më mirë sesa vetë djalli Edi Rama!
Nëse Shpërngulja masive e shqiptarëve vjen prej shtetit të së drejtës së Rilindjes, atëherë në djall shkoftë ky lloj shteti!
Nëse rriten taksat e çmimet dhe nuk rriten pagat e pensionet, pra, nëse rriten fitimet e oligarkëve pranë qeverisë, atëherë u shoftë ky lloj shteti “i së drejtës” që predikon kreu i Rilindjes!
Nëse shteti i së drejtës i jep privilegjin kryeministrit të vendit të udhëtojë me avion special edhe për shoping në New York e të harxhojë miliona euro nga taksat tona, atëherë duhet të ketë ndërruar kuptimi i këtij nocioni. Duhet që filozofët dhe teoricienët e politikës të djegin librat dhe veprat që ata kanë shkruar për këtë lloj shteti! Duhet të rishikohen teoritë e shtetit që prej Platonit e Aristotelit e deri të Immanuel Kant, Jean Jacques Rousseau e John Rawls!
Shteti i së drejtës, nuk ia jep kryeministrit atributin të manipulojë e të uzurpojë të gjitha pushtetet në duart e tij, siç ka ndodhur në 12 vitet e Rilindjes. Dhe nëse duhet ta pranojmë këtë, atëherë duhet të pranojmë edhe se e drejta ka ndërruar vendin e saj me padrejtësinë!
Nëse Edi Rama e quan të drejtë burgosjen e 38 mijë shqiptarëve në një vit për kundravajtje, me qëllim të mos shihej kanabizimi i Shqipërisë, siç ndodhi në vitin 2014-2015, atëherë në ferr shkoftë ky lloj shteti “i se drejtës”!
Ai që për 12 vite nuk dëshmoi asnjë moment se di e do të ndërtojë shtetin e së drejtës, ai edhe 120 vjet të tjera nuk do ta bëjë këtë! Thjesht se nuk do ta bëjë! Arroganca dhe diktatura, lakmia për pushtet, pasuri, lavdi e për prestigj janë e kundërta e shtetit të së drejtës. Edi Rama heq dorë nga jeta e vet, por jo edhe nga lakmitë e përmendura më sipër!
