“Ra nga dritarja”, këngëtari rus që kritikoi luftën e Putinit në Ukrainë

Kantautori rus Vadim Stroykin, i cili foli publikisht kundër luftës së Putinit në Ukrainë, ra nga dritarja sot gjatë një kontrolli të banesës së tij nga shërbimet e sigurisë, raportoi projekti për të drejtat e njeriut OVD-Info. Portali i pavarur rus Meduza raporton se Stroykin vdiq në vendngjarje.

Mediat ruse raportojnë se oficerët e policisë vizituan shtëpinë e Stroykin si pjesë e një hetimi ndaj tij për gjoja financimin e Forcave të Armatosura të Ukrainës.

Sipas kanalit rus Telegram Mash në Moike, gjatë marrjes në pyetje Stroykin kërkoi të shkonte në një dhomë tjetër, ku hapi shpejt dritaren dhe u hodh.

“Gjatë hetimit, ai gjeti një justifikim për të shkuar në një dhomë tjetër, ku hapi me shpejtësi dritaren dhe ndërmori një veprim të pakthyeshëm,” raporton Mash në Moike, duke theksuar se ishte një vetëvrasje.

Komiteti Hetues Rus ka hapur një hetim zyrtar për rrethanat e vdekjes së Stroykin, raportojnë mediat ruse.

Vadim Stroykin ka kritikuar më parë publikisht pushtimin rus të Ukrainës. Në vitin 2022, ai postoi një mesazh në rrjetin social VKontakte, në të cilin kundërshtonte luftën e nisur nga Kremlini.