Mos e ndihmoni ushtarin Vuçiç!
nga Agim Popoci
Dy ditë pas Ditës D që kishin përcaktuar batonë e buzhalë të ndihmuar edhe nga grenellë, kur Albin Kurti nuk arriti të realizoi objektivin 500 K dhe rivalët e tij nuk arritën të marrin besimin qytetarë për të qeverisur me Kosovën, asnjëra nga partitë rivale të Lëvizjes Vetëvendosje nuk ka arsye ta ndihmoj ish-ministrin e qeverisë së Slobodan Milosheviçit sot President i Serbisë, Aleksandar Vuçiç, që ka mbetur pa asnjërin nga kolegët e tij ministra me të cilët sulmoi Kosovën në vitin 1999, dhe as të bëjë filma epik si “Saving Private Ryan” i Steven Spielberg, jo vetëm pse nuk jemi në Normandi, por, para vetes kemi një rezultat paraprak të Komisionit Qendror të Zgjedhjeve që na jep një rrugëzgjidhje pa rrezikuar asgjë!
Partitë opozitare pretendente për qeverisje, PDK, LDK e AAK, duhet ta pranojnë vullnetin e sovranit dhe nuk kanë asnjë arsye në botë ta ndihmojnë ushtarin Vuçiç që ta heqë qafe Albin Kurtin, të formoj Asociacionin e komunave me shumicë serbe në Kosovë, të kthej bandën e Radoiçiçit në Veri ashtu si dhe strukturat paralele, dhe, të vazhdoj me politikën e tij destruktive në Kosovë, aty ku e la katër vjet më parë!
PDK, LDK dhe AAK duhet të pushojnë së propaganduari humbjen e Albin Kurtit në këto zgjedhje kur, ai, ndonëse me një pjesëmarrje në zgjedhje më të ulët në zgjedhje prej 8.19 për qind në krahasim me vitin 2021, arriti të renditet i pari duke marrë 40.83 të votave pa diasporën, që lehtësisht mund të shkojë mbi 45 për qind, shifër kjo më e ulët se 50.28 për qind në vitin 2021, por, dhe një shifër që këto parti nuk e arritën kurrë në asnjë palë zgjedhje pavarësisht se ishin protagonistet kryesore të zhvillimeve historike në Kosovë!
Po, këtu përjashtim bënë LDK-ja e Ibrahim Rugovës e cila në vitin 2001 mori 45.65 për qind, por është dhe vit i turpshëm për PDK-në e cila edhe pse u fut si çlirimtare në zgjedhjet e para parlamentare arriti të marrë vetëm 25.7 për qind të votave, ndërsa kulmin e arriti në vitin 2007 kur fitoi zgjedhjet me 34.3 për qind, nivel që nuk e arriti më kurrë!
Përrallat me antiamerikanizmin e Albin Kurtit nga kutitë propagandistike të Shkëlqim Devollit dhe Ekrem Llukës nuk ndryshuan përmbajtjen e kutive të votimit, gjithsesi duhet të shërbejnë për PDK, LDK dhe AAK si leksione për të gjetur rrugë të tjera për ta dërguar Kurtin në opozitë; Duke mos harruar se rrugë të tilla janë të shumta!
Dhe, Albin Kurti argat i Serbisë! Shumë gjëra janë mbivendosur në Kosovë që nga ditët e para të çlirimit, si patriotizmi ashtu dhe krimet serbe në duart e shqiptarëve, por, rezultati i zgjedhjeve të 9 Shkurtit na tregon se veprimi i Qeverisë Kurti 2 në Veri i ka dhënë goditje edhe Listës Srpska që financohet nga krimineli Milan Radoiçiç dhe kontrollohet nga Vuçiç.
Mosprezenca e bandave të Radoiçiçit në Veri ka bërë që më 9 shkurt Lista Srpska të marrë 36.784 vota ose 4.43 për qind, duke pësuar një rënie në krahasim me vitin 2021 me 7.623 vota ose 0.66 për qind, që përveç rënies nën pragun elektoral prej 5 për qindve, shprehur në ulëset e pakicave në Parlamentin e Kosovës është shumë!
Nga ana tjetër, Albin Kurti duhet ta pranoj realitetin e krijuar dhe të mendoj për krijimin e një qeverie stabël që do ta çojë Kosovën përpara drejt NATO-s dhe BE-së edhe me kompromisin e një Presidenti të Republikës nga radhët e partnerit të ri të koalicionit!
Numërimi i votave të diasporës në asnjë mënyrë nuk duhet t’ia ndërroj mendjen Lëvizjes Vetëvendosje pasi ti jetë afruar 50 përqindshit, sepse arritja e votimit të një shumice të brishtë parlamentare sjellë dhe qeverisje të brishtë që mund të mos e pres fare krizën politike me zgjedhjen e Presidentit të ri. Dhe, për këtë hap i duhet një koalicion me një parti të fortë në skenën politike, para vendimeve shumë të forta që e presin Kosovën si në dialog me Serbinë ashtu dhe të ardhmen euroatlantike.
Pse PDK mendon ndryshe nga LVV sot është problem i saj, por qëndrimi në skenën politike dhe rikthimi në krye të qeverisë pa liderin Hashim Thaçi u konfirmua se është një mision i pamundur!
Sa për kalimin e ylberit, PDK nuk ka se pse të skuqet kur ka qeverisur edhe me LDK-në, kundërshtare të zellshme që as në ëndërr nuk mund ti shfaqet! Dhe, lirimi i Hashim Thaçit dhe vazhdimi i mandatit të Presidentit aty ku e la para arrestimit, është një vijimësi jo vetëm për PDK-në, por, për të gjithë ata që Gjykata Speciale ua preu ëndrrën e shtetit të Kosovës!
Për t’u arritur ky synim, nuk kemi pse të marrim shembuj nga bota, kemi Presidentin e Kroacisë, Franjo Tugjman, me aleatë dhe armiq të ngjashëm me Kosovën, i cili jo vetëm që e tha por dhe e arriti:
“Në epokën tonë historike, synimi më i lartë historik i çdo qenieje kombëtare mbetet arritja e lirisë së plotë kombëtare në një shtet sovran, të vetin.”
