Sabotimet në anijet luftarake të marinës gjermane

Marina gjermane ka konfirmuar disa raste të dëmtimit të anijeve luftarake. Sipas hulumtimeve të mediave, dyshohet edhe për sabotim të korvetës gjermane “Emden”. Si po reagojnë autoritetet gjermane?

Sipas hetimeve të transmetuesve publikë WDR, NDR dhe Süddeutsche Zeitung, SZ,autoritetet gjermane të sigurisë po hetojnë aktualisht rrethanat e një sabotimi të mundshëm në anijen luftarake “Emden”. Sipas raportimeve të mediave, hetimet për këtë rast janë marrë përsipër nga Zyra Shtetërore e Krimeve të Hamburgut, Landeskriminalamt.

Pas publikimit të raporteve në media, Komandanti i Përgjithshëm i Marinës Gjermane, Jan Christian Kaack, konfirmoi se diversantët kishin në shënjestër anijet luftarake gjermane në disa raste, që do të thotë se ky nuk ishte vetëm një akt i vetëm. Në një tubim në Berlin, Kaack tha se kishte “më shumë se një sabotim”. Ai shtoi se janë marrë masat e duhura për të mbrojtur anijet e marinës gjermane. Persona të panjohur, sipas WDR, NDR dhe SZ, kanë hedhur dhjetëra kilogramë rruaza metalike në motorin e anijes “Emden”.

Sipas ekspertëve të anijeve luftarake, copat metalike mund të shkaktojnë dëme të konsiderueshme në anije nëse nuk zbulohen në kohë. Për më tepër, koha për dorëzimin në përdorim të anijes në Bundeswehr mund të zgjatet ndjeshëm.

Një zëdhënës i Blohm+Voss, i pyetur nga gazetarët për këtë incident specifik, deklaroi se kompania e tij nuk do të komentojë çështjet që lidhen me rastin. Zyra e Hetimeve Kriminale Shtetërore të Hamburgut dhe Zyra kompetente e Prokurorisë Shtetërore në Hamburg gjithashtu konfirmuan se nuk do të komentojnë.

NATO paralajmëron për shtimin e sulmeve

Rrethanat e tentativës për sabotim janë ende të paqarta për momentin. Ajo që dihet është se korveta “Emden” i nevojitet urgjentisht Marinës Gjermane. Kjo anije duhet të përdoret për të monitoruar hapësirën detare, e cila është një detyrë e rëndësishme, veçanërisht në kohët kur NATOparalajmëron për intensitetin në rritje të sulmeve hibride nga Rusia, përfshirë zonën e Detit Baltik.

Që në maj të vitit 2023, kur u lëshua anija luftarake “Emden”, kryetari i bashkisë së qytetit Emden, emrin e të cilit mban anija, tha me krenari se “Emden” mishëron forcën dhe guximin e Marinës sonë. Zëvendëskomandanti i Përgjithshëm i Marinës Gjermane, e quajti korvetën e re “një hap tjetër i rëndësishëm për lëvizjen tonë” për praninë dhe fuqinë luftarake në krahun verior, dhe veçanërisht në Baltik”.

Bundeswehr-i ka porositur gjithsej pesë korveta të reja të klasit 130 me një kosto prej dy miliardë eurosh. Ato po ndërtohen në disa kantiere detare në Gjermaninë veriore, duke përfshirë Blohm+Voss në Hamburg, një kompani që i përket grupit Naval Vessels Lürssen, NVL, nga Bremeni, i cili po koordinon zbatimin e kësaj pune.

Dronët mbi Gjermani

Pavarësisht nga incidenti i fundit në korvetën “Emden”, autoritetet gjermane të sigurisë kanë paralajmëruar prej muajsh për një rritje të numrit të aksioneve të mundshme spiunazhi ose sabotazhesh rusenë të gjithë Evropën – kryesisht të lidhura me objektivat ushtarakë. Kohët e fundit, fluturime gjithnjë e më të shpeshta të dronëve të panjohur janë vërejtur në Gjermani, duke fluturuar mbi objektet e Bundeswehrit, impiantet industriale, madje edhe mbi bazën ushtarake amerikane të Ramstein.

Në janar, mjete ajrore pa pilot u vunë re edhe mbi vendndodhjen e objekteve të Forcave Ajrore Gjermane në Schwesing në landin Schleswig-Holstein. Ndër të tjera, ushtarët ukrainas po trajnohen atje për të operuar sistemet e mbrojtjes ajrore Patriot. Deri më tani, autoritetet gjermane kanë dështuar në përpjekjen e tyre për t’u mbrojtur kundër këtyre avionëve, ose më saktë, nuk kanë arritur të zbulojnë se nga kanë ardhur dhe ku kanë shkuar.

Kaack: „Po na testojnë”

Komandanti i Marinës Kaack thotë se përveç tentativave për sabotim në anije, ka dhe raste kur disa persona të paautorizuar kanë tentuar të hyjnë në objektet e marinës gjermane, e ka pasur edhe tentativa për t’iu afruar ushtarëve me uniformë teksa ata ishin në rrugë për në shtëpi. “Vlerësimi ynë është: ata po na testojnë.” Po tentohet të futet pasiguria në shoqëri, shtet, madje edhe në Aleancë. “Kështu ndoshta po hidhen themelet për aktivitete të mundshme ushtarake të mëvonshme,” tha zëvendësadmirali gjerman.

Marina gjermane, siç pretendon Kaack, ka zbatuar tashmë disa masa parandaluese për këtë çështje në vitin 2022: “Kërcënimi në rritje nga Rusia është një çështje më urgjente në fillim të vitit 2025 sesa situata që mbizotëronte dy vjet më parë” thekson Kaack duke përfunduar:

“Ekspertët dhe shërbimet sekrete bien dakord që Rusia do të jetë në gjendje të hyjë në konflikt me NATO-n nga viti 2029.”/DW/