Reshje bore, probleme në qarkullimin e mjeteve në Rrugën e Kombit

Qarku i Kukësit është përfshirë nga reshjet e dëborës gjatë gjithë natës dhe mëngjesin e sotëm, ku si pasojë kanë sjellë edhe vështirësi në qarkullimin e mjeteve.

Rruga që ka shfaqur më shumë probleme ka qenë ajo e Kombit në segmentin Thirr-Fan-Reps, ku për shkak të prezencës së borës e akullit janë shënuar dy aksidente zinxhirë, ndërsa në daljen e fshatit Fan një mjet tjetër ka dalë nga rruga, fatmirësisht vetëm me dëme materiale.

Rrëshqitja e kamionit ka shkaktuar radhë të gjata automjetesh, ndërsa nga ky incident deri më tani nuk raportohet për persona të lënduar.  

Reshjet e borës janë prezente në të gjitha akset nacionale e rurale, drejtuesit e mjeteve duhet të bëjnë kujdes të ulin shpejtësinë dhe të jenë të pajisura me mjete dimërore ndërsa raportohet për borëpastruese në terren.

Temperaturat e ulëta kanë rikthyer reshjet e dëborës edhe në Qarkun e Shkodrës

Disa centimetra dëborë  kanë rënë mbrëmjen e kaluar dhe mëngjesin e sotëm, në zonat e thella, në Kelmend të Malësisë së Madhe dhe Pukë.

Deri më tani ka probleme në disa fshatra me mungesën e energjisë elektrike, ndërsa qarkullimi vijon normalisht.