Policia e Kosovës aksion në veri, mbyll katër qendra ilegale

Policia e Kosovës ka mbyllur sot katër qendra ilegale në veri të Mitrovicës. Bastisjet nisën pasi fillimisht ishin arrestuar katër zyrtarë të Qendrës për Punë Sociale në Zubin Potok, një ditë para zgjedhjeve parlamentare, lidhur me veprën penale, cenim i përcaktimit të votuesve.

Këtë e ka konfirmuar Zv/Drejtori i Policisë, Veton Elshani, i cili tha se këta zyrtarë të Qendrës për Pune Sociale, e cila ishte strukturë paralele, dyshohej se kanë thirrur qytetarë të ndryshëm në telefon dhe nën formën e kërcënimit i kanë detyruar apo udhëzuar se si të votojnë, duke i kushtëzuar ndihmat sociale me votën e tyre, në favor të një partie të caktuar politike e cila ishte në garë për zgjedhjet parlamentare në Kosovë.

Fillimisht, tha ai, e kishin njoftuar për punën hetimore Prokurorinë Themelore në Mitrovicë e kjo e fundit iu drejtua Gkykatës, me urdhër të së cilës nisën kontrollet në këto qendra ilegale.

“Më 08 shkurt 2025, një ditë para zgjedhjeve Parlamentare në Kosovë, ne kishim arrestuar 4 persona (zyrtarë të Qendrës për Punë Sociale në Zubin Potok), në lidhje me veprën cenim i përcaktuesve të votuesve. Në fakt këta zyrtarë të Qendrës për Punë Sociale e cila ishte në strukturë paralele/ilegale dyshohej se kanë thirrur qytetarë të ndryshëm në telefon dhe nën formën e kërcënimit i kanë detyruar apo udhëzuar se si të votojnë, duke i kushtëzuar ndihmat sociale me votën e tyre në favor të një partie të caktuar politike e cila ishte në garë për zgjedhjet parlamentare në Kosovë.

Lidhur me punën tonë hetimore ne e kemi njoftuar Prokurorinë Themelore në Mitrovicë nga të cilët kemi kërkuar që të na lejohet kontrolli i këtyre qendrave me qëllim të zbulimit të provave me të cilat do të vërtetohet saktë mënyra e veprimit të këtij aktiviteti të kundërligjshëm e që cilësohet si falsifikim i dokumenteve,” sqaroi Zv/Drejtori i Policisë, Veton Elshani, duke përfunduar:

“Prokuroria Themelore në Mitrovicë e ka aprovuar kërkesën tonë dhe e ka dërguar mandej kërkesën e vetë për urdhër të kontrollit në Gjykatë, gjë të cilën edhe e ka marr, dhe tani jemi në kontrolle të këtyre qendrave me urdhër të Gjykatës. Pas kontrollit të këtyre vendeve, ne do të njoftojmë prokurorinë me të gjeturat, e cila pastaj do të vendosë për hapat e mëtejmë.”