Sulmet ndaj SPAK dhe GJKKO-së, Erion Bani: Nuk mund t’i bëhet gjyqi gjyqtarëve! Kush ka dyshime…
Të gjithë gjyqtarët e këtij institucioni, përfshirë edhe familjarët e tyre, mund të jenë të përgjueshëm në kohë reale, tha gjyqtari i GJKKO-së, Erion Bani, duke shtuar se çdo informacion dhe komunikim mund të monitorohet.
Duke folur në tryezën e drejtësisë, gjyqtari Bani sqaroi se për shkak të ligjit dhe masave të monitorimit të rrepta, integriteti i gjyqtarëve është i prezumuar, dhe kush ka indicie konkrete kundër tyre duhet t’i drejtohet organeve kompetente, jo që të bëhet një gjyq i gjyqtarëve.
“Lidhur me integritetin si GJKKO dhe SPAK dhe BKH janë institucione më të monitoruara, për shkak të ligjit. Jo vetëm gjyqtarët, por edhe familjarët i nënshtrohen kontrollit periodik të pasurisë, monitorimit nga drejtoria e Përgjithshme e Parandalimit të Pastrimit të Parave, dhe mund të përgjohen në kohë reale të gjitha komunikimet, të gjitha mesazhet.
Sa i takon integritetit, duhet të theksojmë një fakt që parimet ndërkombëtare dhe jurisprudenca e Strasburgut kanë një parim të rëndësishëm që prezumohet integriteti, besueshmëria e gjyqtarëve në momentin që janë emëruar. Kjo gjë prezumohet. Kush ka indicie në lidhje me integritetin duhet t’i adresojë në organet kompetente. Nuk mund të behët gjyqi i gjyqtarit. Gjyqin e gjyqtarit e bën vetëm një gjykatë më e lartë. Këto janë parimet që duhet të kuptohen,” tha Erion Bani ndërsa për përzgjedhjen e gjyqtarëve të GJKKO ai shtoi se kalon përmes një procesi të thelluar verifikimi, më të rreptë se ai i gjyqtarëve të tjerë.
“Sa i takon kritereve që të bëhesh pjesë e GJKKO ka një kontroll të posaçëm në organet e vettingut. Vettingu ishte më i thellë, dhe qëllimi ishte për të kthyer besimin e qytetarëve në sistemin e drejtësisë. Ne kemi kaluar filtër ndryshe nga gjyqtarët e tjerë.”
Integriteti këtu është prezumuar, kush ka dyshime t’i adresojë në organet kompetente. Vettingu që iu është bërë gjyqtarëve të GJKKO nuk i është bërë asnjë gjyqtari. Është kontrolluar, pasuria, integriteti dhe pasuria, por është kontrolluar integriteti i familjarëve të tyre në rreth shumë të gjerë,” tha Bani duke saktësuar se monitorimi i pasurisë dhe aktivitetit të gjyqtarëve është nën mbikëqyrjen e institucioneve si BKH dhe drejtoria për parandalimin e pastrimit të parave.
Ndryshe, këto komente gjyqtari i GJKKO-së, Erion Bani, i bëri në tryezën e drejtësisë organizuar nga Qendra për Studimin e Demokracisë dhe Qeverisjes, CSDG, pasi u prezantua Raporti krahasues i vlerësimit mbi punën e institucioneve të posaçme të drejtësisë gjatë vitit 2024.
