Pas dëshmive në Kongresin e SHBA: Emergjencë kombëtare, Ligj për desorosifikimin e Shqipërisë
Pas dëshmive në Kongresin e SHBA, duke e cilësuar desorosifikimin e Shqipërisë si një emergjencë kombëtare, Kryetari i Partisë Demokratike, Sali Berisha, kërkoi sot në seancë plenare të parlamentit miratimin e Ligjit për desorosifikimin sa më shpejt, për të shmangur pasojat negative pas zgjedhjeve.
“Një tërmet i madh politik ka ndodhur në botë dhe ju nuk mund të bëni të paditurin. Nuk mund të fshiheni sepse ky tërmet ka pasur pasqyrime apo reflektimin më të madh pas SHBA në Shqipëri.
Ju vazhdoni të bëni sikur do mund t’i mbani në këmbë akte, qëndrime, të cilat janë në armiqësi të plotë jo vetëm me Shqipërinë, por me të gjitha vendet e lira, me të gjitha vendet që aspirojnë të mbeten të tilla.
Prandaj dhe Ligjin pranojeni më mirë si e keqja më e vogël për ju, se ai do bëhet pas zgjedhjeve, u garantoj se do u dhembë shumë. Më mirë tani se pas zgjedhjeve,” tha Sali Berisha duke argumentuar pse Ligji për desorosifikimin e Shqipërisë është një emergjencë kombëtare.
Ndryshe, mbrëmë në Kongresin Amerikan, në Komisionin e ngritur nga Agjencia e Elon Musk, DOGE, ndërsa u dëgjuan dëshmi mbi abuzimet me fondet e taksapaguesve amerikanë, gazetari investigativ dhe autori i njohur, Tyler O’Neil, tha se paratë e USAID janë përdorur për të persekutuar liderin e opozitës shqiptare, Sali Berisha.
“Fondacionet e Shoqërisë së Hapur dhe USAID kanë bashkëpunuar gjithashtu në mbështetjen e ‘East West Management Institute’, i cili mori 31.2 milionë dollarë nga USAID në vitin e fundit të plotë fiskal që përfundon më 30 shtator. Instituti nisi ndryshimet gjyqësore në Shqipëri, që kritikët pretendojnë se rezultuan në persekutimin e liderit të opozitës shqiptare Sali Berisha, duke i mbyllur gojën kundërshtarit të kryeministrit socialist të vendit,” tha gazetari i “The Daily Signal”, Tyler O’Neil.
Deklaratë:
Siç e shihni, një tërmet i madh politik ka ndodhur në btoë dhe ju nuk mund të bëni të paditurin.
Nuk mund të fshiheni sepse ky tërmet ka pasur pasqyrime apo reflektimin më të madh pas SHBA në Shqipëri.
Ky tërmet është përmbysja e sorosizmit dhe ekstremit të majtë në SHBA, por që pati reflektime të tmerrshme edhe në këtë vend.
Ju kërkoni ta kaloni në një kohë kur atje, në atë vend, çdo ditë presidenti firmos zinxhir dekretesh për desorosifikimin e SHBA, ju vazhdoni të bëni sikur do mund t’i mbani ato në këmbë.
Të mbani në këmbë akte, qëndrime, të cilat janë në armiqësi të plotë jo vetëm me Shqipërinë, por me të gjitha vendet e lira, me të gjitha vendet që aspirojnë të mbeten të tilla.
Ndaj me urgjencë ligji për desorosifikimin e Shqipërisë është një emergjencë kombëtare.
Është më mirë të behet tani se sa kur ta bëjmë ne fill pas zgjedhjeve se do thoni po na persekutoni.
Por unë u garantoj se do ketë të njëjtën peshë me ligjin që do bëhet për dekomunistizimin.
Pra, më mirë të bëjmë një ligj tani.
Sepse ju e dëgjuat mbrëmë Kongresin e SHBA.
Nuk janë më tash vetëm tre organizatat më të mëdha në botë partiake, por është institucioni themelor i demokracisë, ku ju u cituat për akte antidemokratike dhe për plaçkitje të fondeve të SHBA.
Prandaj dhe ligjin pranojeni më mirë si e keqja më e vogël për ju, se ai do bëhet pas zgjedhjeve, u garantoj se do u dhembë shumë.
Më mirë tani se pas zgjedhjeve.
