Kosovë, përfundon procesi i numërimit të votave të zgjedhjeve të 9 shkurtit

Komisioni Qendror i Zgjedhjeve i Kosovës, KQZ, e përfundoi mbrëmjen e së mërkurës, procesin e numërimit të votave të zgjedhjeve parlamentare të 9 shkurtit.

Votat me kusht dhe votat e personave me nevoja të veçanta ishin të fundit që u numëruan në Qendrën e Numërimit të Rezultateve.

KQZ pritet t’i shpallë rezultatet përfundimtare për zgjedhjet për Parlamentin e Kosovës dy ditë pas përfundimit të numërimit të të gjitha votave.

Zëdhënësi i KQZ-së, Vlamir Elezi, tha se partitë apo kandidatët për deputetë kanë 48 orë kohë për të bërë ankesa në Panelin Zgjedhor për Ankesa dhe Parashtresa, PZAP, në lidhje me ndonjë shkelje të supozuar gjatë numërimit që është zhvilluar në Qendrën e Numërimit dhe Rezultateve.

Sipas të dhënave të KQZ-së, partia në pushtet, Lëvizja Vetëvendosje, i ka fituar edhe votat me kusht dhe ato të personave me nevoja të veçanta.

Ajo i ka fituar 5.214 vota me kusht, ose 44.25 për qind, si dhe 824 ose 31.88 për qind e votave të personave me nevoja të veçanta.

Partia Demokratike e Kosovës i fitoi 20.17 për qind, ose 2.377 vota me kusht dhe 621 ose 24.02 për qind të votave të personave me nevoja të veçanta.

Lidhja Demokratike e Kosovës i mori 13.64 për qind, ose 1.607 vota me kusht, dhe 19.54 për qind ose 505 vota të personave me aftësi të kufizuara.

Lista Srpska arriti t’i fitojë 6.33 për qind, ose 746 vota me kusht, dhe 7.85 për qind ose 203 vota të personave me nevoja të veçanta.

Ndërsa koalicioni Aleanca për Ardhmërinë e Kosovës-Nisma i mori 5.63 për qind, ose 4663 vota me kusht dhe 8.86 për qind, apo 229 vota të personave me nevoja të veçanta.

Sipas rezultateve përfundimtare, që përfshijnë edhe votat në vendvotimet në Kosovë, ato në përfaqësitë diplomatike dhe me postë, asnjëra parti nuk ka siguruar numër të mjaftueshëm për të qeverisur e vetme.

Për të pasur shumicën, nevojiten së paku 61 deputetë në Parlamentin me 120 ulëse të Kosovës.

Si partia e parë, Vetëvendosje i ka fituar 396.022 vota, ose 42.27 për qind, duke i siguruar 48 ulëse. Udhëheqësi i saj, kryeministri Albin Kurti, është zotuar se do ta formojë qeverinë në mënyrë të pavarur. Partitë aktualisht në opozitë, përveç Nismës, e kanë përjashtuar mundësinë e koalicionit me të./RFE/