Ambasadori i BE, Gonzato: Sfida e vërtetë e Shqipërisë kryerja e reformave, do të vijojmë monitorimin

Shqipëria ka pasur progres në negociatat me Bashkimin Europian, por sfida e vërtetë nuk është hapja e grupkapitujve, por kryerja e reformave, tha Ambasadori i BE, Silvio Gonzato, në mbledhjen e Këshillit Kombëtar të Integrimit Europian ndërsa shtoi se legjislacioni i Shqipërisë duhet të jetë në përputhje me atë të BE në të gjitha fushat.

BE, tha Ambasadori Gonazato, mbështet qëllimin e madh të Shqipërisë për të çelur të gjithë kapitujt deri në fund të vitit 2027.

“Për këtë arsye do të keni përkrah delegacionin e BE që do ju shoqërojë në këtë proces por edhe do t’ju monitorojë me një vëmendje të tejskajshme,” siguroi Ambasadori Gonzato duke evidentuar progresin në negociatat me BE.

“Çelja e negociatave për grupkapitullin 2, që është tregu u brendshëm, dhe grupkapitullin 3, që është konkurrueshmëria është gati duke u arritur. Shqipëria ka çuar qëndrimin e vet negociues 10 ditë më parë dhe BE po përgatit qëndrimin e vet që të organizohet konferenca tjetër ndërqeveritare sa më shpejt të jetë e mundur.

Shpresojmë që të gjithë grupkapitujt të hapen këtë vit. Por sfida e vërtetë nuk është hapja e grupkapitujve por kryerja e reformave që janë të domosdoshme në mënyrë që legjislacioni i Shqipërisë të jetë në përputhje me atë të BE në të gjitha fushat.

Ndaj mbështesim objektivin dhe qëllimin e madh të Shqipërisë për të çelur të gjithë kapitujt deri në fund të vitit 2027 dhe për këtë arsye do të keni përkrah delegacionin e BE që do ju shoqërojë në këtë proces por edhe do t’ju monitorojë me një vëmendje të tejskajshme,” tha kreu i delegacionit të Bashkimit Evropian në Shqipëri, Silvio Gonzato, duke përfunduar:

“Dëshiroj të theksoj edhe rëndësinë që ka roli dhe puna e zyrës së Komisionerit për Mbrojtjen nga Diskrimimi, për ti ndihmuar dhe për të promovuar barazinë. Kam besimin që Parlamenti i ri do të marrë hapat e duhur dhe më në fund do të emërojë Komisionerin e ri, sepse mandati i Komisionerit të tanishëm ka kaluar kohë më parë. BE do të mbetet krah jush në mbështetje tuaj.”