Presidenti Trump: Do të flas me presidentin Putin më 18 Mars!

Presidenti i Shteteve të Bashkuara, Donald Trump, tha se ka në plan të flasë me telefon me presidentin e Rusisë, Vladimir Putin, të martën e 18 marsit në përpjekje për të ndërmjetësuar një armëpushim në luftën në Ukrainë, e cila ka hyrë tashmë në vitin e katërt.

“Do të flas me presidentin Putin të martën. Është bërë shumë punë gjatë fundjavës,” tha Trump për media gjatë një fluturimi për në Washington nga resorti i tij në Floridë.

“Duam të shohim nëse mund t’i japim fund kësaj lufte. Ndoshta mundemi, ndoshta nuk mundemi, por mendoj se e kemi një shans shumë të mirë,” tha PresidentiTrump.

I pyetur për koncesionet e mundshme që kërkohen për të siguruar armëpushim, Presidenti amerikan tha se do të flasin për tokën, do të flasim për termocentralet.

“Mendoj se shumëçka është diskutuar prej të dyja palëve, Ukrainës dhe Rusisë. Tashmë jemi duke diskutuar, duke ndarë asete të caktuara,” tha Presidenti Trump.

Nga Kremlini nuk pati komente të menjëhershme.

Presidenti i SHBA, Donald Trump, gjatë muajve të parë të mandatit të tij të dytë, e ka bërë prioritet arritjen e një marrëveshjeje armëpushimi për luftën në Ukrainë.

Pas bisedimeve në Arabinë Saudite, zyrtarët ukrainas dhe amerikanë kanë njoftuar më 11 mars se Kievi ka rënë dakord për një armëpushim 30-ditor.

Moska, deri më tash, ka reaguar me gjakftohtësi ndaj idesë.

Putin ka propozuar edhe kushte shtesë, përfshirë ngrirjen e furnizimeve të Kievit me armë nga SHBA-ja.

Ndërkohë, një zyrtar i lartë rus tha se Moska do të insistojë që Ukraina të mos lejohet të bashkohet me NATO-n dhe të mbetet “neutrale” në çdo marrëveshje paqeje – kushte që Kievi i ka refuzuar prej kohësh.

Putin tha më 14 mars se çdo marrëveshje duhet të çojë në paqe afatgjate dhe t’i adresojë arsyet “rrënjë” të luftës – një referencë kjo, mësa duket, ndaj zgjerimit të NATO-s dhe zhvillimeve të tjera që ai pretendon se e kanë vënë në rrezik sigurinë e Rusisë.

Sot, Zv/Ministri i Jashtëm i Rusisë, Aleksandr Grushko, tha për gazetën ruse “Izvestia” se do të kërkojnë që garancitë e hekurta të sigurisë, të bëhen pjesë e kësaj marrëveshjeje.

“Pjesë e këtyre garancive duhet të jetë statusi neutral i Ukrainës, refuzimi i vendeve të NATO-s për ta pranuar atë në aleancë.”

Presidenti ukrainas, Volodymyr Zelenskyy, tha shpesh se për të pranuar një marrëveshje paqeje, Kievi duhet të ketë garanci sigurie nga partnerët perëndimorë, përfshirë anëtarësimin eventual në NATO.

“Unë kam këmbëngulur për anëtarësimin e Ukrainës në NATO, por ju e dini se cilat kanë qenë përgjigjet,” tha ai në muajin shkurt, duke shtuar se rruga për t’u bashkuar me aleancën ushtarake perëndimore, vazhdon të pengohet.

Sekretari amerikan i Shtetit, Marco Rubio, tha dje në një intervistë për CBS-in se marrëveshja përfundimtare e paqes do të përfshinte shumë punë, lëshime si nga Rusia, ashtu edhe nga Ukraina ndërsa përfundoi:

“Bisedimet e tilla vështirë do të fillojnë, për aq kohë sa ata qëllojnë kundër njëri-tjetrit”.