Të ndryshoj vendimi i KPK-së, Kreu i SPAK: Të shkarkohet kreu i Prokurorisë Lezhë, Erjon Shehaj

Në Kolegjin e Posaçëm të Apelimit, KPA, ndaj kryeprokurorit të Lezhës, Erion Shehaj, kreu i SPAK, Altin Dumani, ka kërkuar shkarkimin e tij nga detyra.

Gjatë paraqitjes së pretendimeve të tij në KPA, Altin Dumani si përfaqësues i Prokurorit Publik, argumentoi se vendimi i Komisionit të Pavarur të Kualifikimit, KPK, duhet të ndryshohet dhe Shehaj duhet të shkarkohet nga detyra si subjekt i rivlerësimit.

“Kërkoj ndryshimin e vendimit të KPK dhe shkarkimin nga detyra të subjektit të rivlerësimit, Erion Shehaj,” u shpreh Altin Dumani duke shoqëruar kërkesën e tij me një dokumentacion prej 22 faqesh, ku përmblidhen konkluzionet e tij mbi çështjen.

Një tjetër çështje e prekur nga kreu i SPAK Altin Dumani ndërsa po paraqet pretendimet, lidhet arrestimin e një personi që është kapur me hashash e lëndë plasëse.

Altin Dumani shprehet se Erion Shehaj e ka dërguar çështjen për gjykim dhe personi është dënuar me 6 vite burg. Për këtë çështje janë kërkuar shpjegime nga ana e KPK dhe Shehaj ka dhënë shpjegimet e tij.

KPK është shprehur që për denoncimin nuk u gjetën indicie për të hetuar, por Kolegji duhet të hetojë në këtë drejtim.

“Në këtë dosje nuk janë bërë hetime, ku e mori drogën personi, ku do ta çonte atë? A jemi përpara veprave penale të kryera në bashkëpunim? Ku e mori lëndën eksplozive? Vetë e montoi? Nëse e montoi vetë, duhet provuar. Personi kishte rrezikshmëri shoqërore dhe dënimi ishte i ulët,” tha Altin Dumani duke përfunduar kërkoi ndryshimin e vendimit të KPK dhe shkarkimin nga detyra të subjektit të rivlerësimit Erjon Shehaj.