OKB: Rreth 500.000 të zhvendosur në Gaza pas rifillimit të sulmeve izraelite
Rreth 500.000 palestinezë janë zhvendosur në Gaza që kur Izraeli rifilloi ofensivën pas prishjes së armëpushimit me grupin palestinez Hamas, ka thënë Zyra e OKB-së për Koordinimin e Çështjeve Humanitare, OCHA.
Siç raporton agjencia palestineze e lajmeve WAFA, zyra e OKB-së ka rikujtuar se qindra mijëra palestinezë ishin zhvendosur disa herë që nga tetori i vitit 2023 deri në armëpushimin e janarit 2025.
Pas sulmeve të dhunshme që rifilloi në Gaza në mars, Izraeli vazhdoi të shkaktonte vdekje dhe zhvendosje dhe të shënjestronte infrastrukturën, në rajon, tha OCHA, raporton Agjencia turke e lajmeve Anadolu.
Ushtria izraelite rifilloi sulmet vdekjeprurëse në Gaza më 18 mars, duke prishur një marrëveshje armëpushimi dhe shkëmbimi të të burgosurve që hyri në fuqi në janar.
Mbi 51.000 palestinezë, shumica prej tyre gra dhe fëmijë, janë vrarë në Gaza nga sulmet brutale izraelite që nga tetori 2023.
Gjykata Ndërkombëtare Penale lëshoi urdhra arresti nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
Izraeli bombardon tendat në Gaza, vriten 10 palestinezë
Ndërkohë Agjencia turke e lajmeve Anadolu raporton se dhjetë palestinezë, përfshirë fëmijë, u vranë në Rripin e Gazës në një sulm të ushtrisë izraelite ndaj tendave ku po strehoheshin palestinezë të zhvendosur.
Sipas dëshmitarëve okularë, ushtria izraelite bombardoi tendat e palestinezëve të zhvendosur në qytetin Khan Younis në jug të Gazës.
Dhjetë palestinezë, përfshirë fëmijë dhe gra, u dogjën për vdekje si pasojë e sulmit.
Raportohet se të vdekurit dhe të plagosurit janë dërguar në spitalin “Nasser” në qytetin Khan Younis.
Pas armëpushimit që hyri në fuqi më 19 janar në Rripin e Gazës, ushtria izraelite rifilloi sulmet e dhunshme mëngjesin e 18 marsit. Që atëherë, 1.652 palestinezë, kryesisht të moshuar, gra dhe fëmijë, kanë humbur jetën dhe 4.391 persona janë plagosur.
Që nga 7 tetori 2023, raporton Agjencia turke e lajmeve Anadolu, ushtria izraelite ka vrarë 51.025 palestinezë në Gaza, ndërsa 116.432 të tjerë janë plagosur.
