Përurohet Ura në Rogovë, Kurti: Lajm i mirë për hasjanët!
Kryeministri në detyrë Albin Kurti, bashkë me ministrin e Mjedisit, Planifikimit Hapësinor dhe Infrastrukturës, Liburn Aliu, kanë përuruar Urën në Rogovë të Hasit ndërsa ka falënderuar banorët për mikpritjen e ngrohtë duke i uruar për këtë urë.
“Urime të gjithëve kjo urë mbi lumin Drin, që e lidh zonën e Hasit me rrugën Gjakovë-Prizren, e gëzofshi. Kjo urë e ka gjerësinë 10 metra, prej tyre 6 e gjysmë për automjete, e 3 metra për këmbësorë në të dyja anët. Në një farë mënyrë 2/3 janë për automjete e 1/3 për këmbësorë. Gjatësia e gjithëmbarshme është rreth 134 metra. Kjo urë kaq shumë e vonuar më në fund u realizua dhe është lajm i mirë edhe për juve edhe për të gjithë ata që do të shkojnë e vijnë në Rogovë,” tha Albin Kurti pas përurimit të urës, ndërsa ministri në detyrë Liburn Aliu tha se është jashtëzakonisht e rëndësishme se gjithë zona e Hasit, jo vetëm Rogova, është tashmë e lidhur me rrugën Gjakovë – Prizren.
“Kjo rrugë bashkë me urën kanë qenë në përgjegjësi të komunës, por si ministri e kemi marrë përgjegjësinë që ta bëjmë edhe projektimin e saj edhe ndërtimin dhe të gjitha u kryen në një kohë mjaft të shpejt. Natyrisht mbetet që edhe pjesa e rrugës të zgjerohet konform urës se si do të jetë me dimensionet e saj, e besoj që edhe komuna do ta bëjë pjesën e vet të punës, ashtu siç kanë premtuar,” tha Liburn Aliu duke uruar që të ketë edhe ura tjera mbi lumin Drin.
Ndryshe, në fund të vitit 2023 është nënshkruar kontrata për ndërtimin e Urës në Rogovë, në prill të vitit 2024 filluan punimet dhe tani në prill të 2025 u bë inaugurimi i saj.
