Kurti: Njëherë Parlamenti, mandej Qeveria!

Kryeministri në detyrë, Albin Kurti, tha sot se hapi i parë institucional duhet të jetë konstituimi i Parlamentit të Kosovës, dhe vetëm pas kësaj mund të diskutohet për formimin e qeverisë së re.

“Një herë Kuvendi, mandej qeveria,” kështu u shpreh sot Albin Kurti në Istog, kur u pyet nëse do të bëhet qeveria e re ndërsa mori pjesë në vendosjen e gurthemelit të projektit për banim social në komunën e Istogut.

Në këtë aktivitet morën pjesë edhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu, dhe kryetari i komunës së Istogut, Ilir Ferati.

“Qysh në fillim të mandatit tonë e patëm miratuar agjendën qeveritare për banim të përballueshëm dhe social bazuar në tri parime themelore; Parimin e gjithëpërfshirjes, atë të mos-segregimit dhe atë të diversitetit. Banimi është e drejtë themelore e njeriut. Për jetesë nevojitet banesë,” tha Kryeministri në detyrë duke bërë të ditur se në janar të vitit 2024, Ministria e Mjedisit, Planifikimit Hapësinor dhe Infrastrukturës ka hapur thirrjen për komunat për ndërtimin e njësive banesore për banim të përballueshëm dhe social, dhe ishin 13 komuna që aplikuan ndërsa projektet janë bërë për 5 komuna, ndër të cilat edhe Istogu.

Ndryshe, ky kompleks, sipas Kryeministrit në detyrë, Albin Kurti, do të shtrihet në një sipërfaqe prej 9.120 m², do të ketë gjithsej 65 banesa, prej tyre 52 për banim të përballueshëm dhe 13 për banim social. Kohëzgjatja e punimeve parashihet të jetë tre vjet, kurse vlera e projekt është 4.9 milionë euro. Kompleksi do të ketë katër tipe të banesave: Tipi A me 53 m² ; Tipi B me 66 m²; Tipi C me 77 m² dhe Tipi D me 87 m².