Si u fut Edi Rama në Bordello, dhe, e nxorën në Semafor!
nga Agim Popoci
Deri të dielën e 11 majit Edi Rama ishte hall i Shqipërisë, sot kur është e qartë se Sigurimi i Shtetit nuk e la të tërhiqet nga posti i Kryeministrit, ai është hall vetëm i Edi Ramës!
Është e lehtë të thuhet se i bleu zgjedhjet, i manipuloi apo dhe i futi në punë patronazhistët, por, pas 12 vjet vjedhjeje dhe shkatërrimi të tokës shqiptare nga kjo qeveri, përshkrimi që i bëri Edi Rama në prag të zgjedhjeve të 11 Majit, Partisë Socialiste, jepte përgjigje për gjithçka çfarë ndodhi nga viti 2005 në këtë parti kriminale dhe me Kryetarin e saj, dhe ishte një paralajmërim se çfarë do të ndodhte edhe me këto zgjedhje parlamentare.
Edi Rama tha se kur mori drejtimin, Partia Socialiste ishte një Bordello!
Rivalët politikë filluan ti qajnë hallin kësaj partie që kishte mbetur pa intelektualë ndërsa filluan të rendisin emrat e profesorëve dhe akademikëve të njohur shqiptarë që frekuentonin Partinë Socialiste, thuajse nuk është kjo parti Bordello që nga krijimi i saj në vitin 1944 e deri në vitin 2005 kur Edi Rama mori çelësat!
Zegjineja me celularë ose Marjana me cjap, mund të jenë simbol i degradimit aktual të kësaj partie, por për të kuptuar pse erdhi deri në këtë derexhe Partia Socialiste, intelektualët dhe e tërë shoqëria shqiptare, së pari duhet kuptuar mënyra e shitjes së mallit në këtë Bordello, fakt i cili do të tregoi me gisht edhe forcën madhore e cila e detyroi Edi Ramën që nga zyrat moderne të dal në semafor! Ose, për legalistët, kush ishte Tutori që detyroi Edi Ramën të refuzoi Bordellon dhe të pranoi Semaforin me shpurën e tij!
Historitë e shumta me gratë e bukura të Partisë Socialiste, Edi Rama nuk i ndaloi me mbylljen e kësaj Bordelloje, sepse shumë prej klientëve kishin ikur dhe nuk ishte e njëjta gjë të quheshe Et’hem ose Arben dhe Spartak ose Shkëlqim, ndërsa emrat që u zëvendësuan përveç respektimit të Shoqërisë së Hapur nuk kishin ndonjë kriter arsimimi apo ideologjie!
Ndonëse gratë e bukura vazhduan frekuentimin e Partisë Socialiste vend të rëndësishëm zunë banditët si nevojë e epokës së Edi Ramës që po fillonte, duke filluar nga çadra e grevës së urisë, 21 Janari, refuzimi i anëtarësimit në NATO, Rrugës së Kombit, liberalizimit të vizave, rrahjeve parlamentare e deri te dekriminalizimi!
Gjithçka që ndodhi përveç se me Geishat e Bashkisë Tiranë që Edi Rama i kishte marrë me vete dhe po i tërhiqte zvarrë në çdo ndërmarrje politike, lidhet me pusin e informacionit që kishte nën kontroll Lali Eri para Semaforit të Partisë Socialiste!
Sot mund të ketë kalkulime të ndryshme se si përfunduan në burg zv/kryeministra, ministra e deri dhe Lali Eri, por kjo nuk ishte një vendimmarrje e Edi Ramës, thjeshtë një shkujdesje e tyre para Semaforit nën syrin e Tutorit!
Ndoshta shumëçka do të ndryshonte sikur Partia Socialiste të mos ishte në pushtet, por vendimmarrja për mbylljen e Bordellos dhe daljen në Semafor ishte një vendim që Tutorin e alarmoi sepse veprimi ishte i domosdoshëm dhe çmimi ishte shumë i lartë, humbja e zgjedhjeve!
Po, ishte shumë më e thjeshtë një Bordello ku kishte një faturë, një arkë dhe administrator legal ndryshe nga syri i Tutorit; Sot, kur është kudo, në kryqëzim, mbi semafor, në bagazhin e makinës dhe pallatet përreth, dhe, shumëçka komplikohet kur bie telefoni dhe kërkohet edhe me patjetër, fitorja e zgjedhjeve!
Pse Edi Rama përfundoi në Semafor ka shumë hamendësime, Shoqëria e Hapur është në hallë sepse po ikën nga sytë këmbët nga trampistët, zengjinët nuk kanë më uri për para ashtu si dhe Kryeministri, i cili tashmë ka nevojë vetëm për pak liri!
“Po, një prostitutë është një humnerë e thellë, ndërsa një grua e huaj është një gropë e ngushtë,” thotë Bibla në Kapitullin 23, por, Edi Rama ishte i pavëmendshëm më 11 Maj edhe pse ishte në Semaforë ndërsa po shikonte kullat që kishin gërvishtur qiellin e Tiranës, ndërkohë shqiptarët po habiteshin me drejtoreshat që po ia fusnin vrapit me çantë plot me para dhe kërcënonin me jetë njerëzish edhe në krye të detyrës!
Për fat të keq, edhe PD nuk ishte e vëmendshme, nuk mbajti sytë as nga Semafori as nga Tutori ndërkohë që Edi Rama me Geishat e qeverisë së tij, me thasë me para siguruan rrugëtimin e tyre për mbylljen e projekteve që kanë ditët e numëruara.
Rasti u shpërdorua, Sigurimi i Shtetit nuk zbriti nga froni i Tutorit ndërsa Edi Rama u detyrua të vazhdoi shërbimin në Semafor duke parë aq sa mund të shihet në një humnerë të thellë…
