Matura Shtetërore, sot rreth 27 mijë nxënës testohen në Gjuhë të huaj

Sot, rreth 27 mijë maturantë do t’i nënshtrohen provimit të parë të Maturës Shtetërore, testimit në Gjuhë të huaj.

Në 145 qendra, provimi do të nisë në orën 10:00 dhe do të zgjasë 2 orë e 30 minuta.

Çdo qendër administrohet nga një përgjegjës administrimi dhe nga administratorë të caktuar për çdo mjedis ku zhvillohet provimi. Gjithashtu janë të angazhuar më shumë se 640 mësues që do të korrigjojnë testet.

Provimet do të zhvillohen në shkolla që plotësojnë kushtet infrastrukturore të përcaktuara në Rregulloren e Maturës Shtetërore.

Këtë vit Ministria e Arsimit dhe Sportit ka vendosur që të ketë edhe teste të personalizuara për maturantët që janë me aftësi speciale.

Ndryshe, katër provimet e detyruara të Maturës Shtetërore zhvillohen me një javë distancë nga njëri-tjetri.

Pas Gjuhës së Huaj, më 10 qershor do të zhvillohet provimi kombëtar i Gjuhës Shqipe dhe Letërsisë, ndërsa më 17 qershor testi për lëndën e Matematikës.

Pasi maturantët të kenë marrë disa prej notave të provimeve të zhvilluara, më 24 qershor japin testin e fundit, atë të Lëndës me Zgjedhje, provim që tregon edhe orientimin shoqëror apo shkencor të maturantëve që do të aplikojnë në universitete.