Surpriza te Kombëtarja ndaj Serbisë! Sylvinho dërgon në tribunë…

Mario Dajsinani, Medon Berisha, Adrian Bajrami dhe Adrion Pajaziti janë të sakrifikuarit e Kombëtares për ndeshjen me Serbinë. “Panorama Sport” mëson se Sylvinho ka vendosur të dërgojë në tribunë këto katër lojtarë, pasi lista e mëparshme ishte me 27 emra.

Vetëm 23 lojtarë mund të përdoren sipas rregullave të UEFA-s dhe lista aktuale i sheh jashtë saj. Surprizë mund të quhet mungesa e Berishës, mesfushori i Seria A që ishte në stol ndaj Anglisë dhe Andorrës.

Pajaziti mori minuta në dy ndeshjet e para kualifikuese dhe mund të konsiderohet po ashtu befasi, ndërsa duhet të presë për mundësinë tjetër. Dajsinani, që ishte një risi nga Sylvinho, nuk do e ketë sot mundësinë për të qenë alternativë e Sylvinhos.

Portieri i Egnatias më parë ka debutuar në miqësore te kuqezinjtë. Adrian Bajrami ndërkohë nuk ka fituar minuta me trajnerin brazilian deri tani, edhe pse ftesa nuk ka munguar.

Ndërkohë nga ana tjetër, Serbia pritet ta nisë në portë me Petroviç, në mungesë të portierit të parë Rajkoviç. Ndërsa treshja e mbrojtjes mund të jetë Erakoviç, Milenkoviç dhe Pavloviç. Sa i përket mesfushës, Zivkoviç, Gudejl, Maksimoviç dhe Tërviç. Në ofensivë, Stojkoviç mund ta nisë me Samarxhiç, Lukiç dhe një sulmues mes Mitroviç ose Vlahoviç. Pa harruar edhe Luka Joviç, i cili është një kandidat i fortë për nga minuta e parë.

Ndeshja delikate Shqipëri-Serbi nis në orën 20:45 në Arenën Kombëtare dhe vlen për kualifikueset e Botërorit 2026.