Video/ Denoncimi i blerjes votave në Tiranë, Berisha: Ky është momenti kriminal i ndarjes së parave

Në vijim të denoncimit të farsës elektorale të 11 Majit, Kryetari i Partisë Demokratike, Sali Berisha, ka sjellë videodëshmi për blerjen e votave në Tiranë, duke konfirmuar momentin kriminal të ndarjes së parave.

Me këtë rast, Kryetari i Partisë Demokratike tha se personazhet në video janë të identifikuar plotësisht, eksponentë të thekur të Partisë Socialiste.

“Narkoqeveria e kreut të organizatës kriminale, Edi Ramës, nuk u mjaftua me shpërndarjen e 76 milionë eurove, 100 euro për pensionist, në total 48 përqind të votuesve për blerjen e votës.
Me dhurimin e 200 milionë eurove gjoba dhe kamata 2 ditë para zgjedhjeve.
Nuk u mjaftua me firmosjen e dhjetëra mijëra lejeve të legalizimit, certifikatave të pronësisë.
Me përdorimin e dhjetëra mijëra automjeteve, të gjitha të shtetit dhe pa asnjë lidhje me fushatat elektorale.
Nuk u mjaftua me punësimin e mbi 10 mijë punonjësve për votë në qeverisjen lokale dhe qendrore, por ajo kaloi direkt dhe në blerje vote duke shpërndarë fshehtas para për zgjedhësit shqiptarë.
Natyrisht shpërndarja e fshehtë e parave është vështirë të kapet sepse ata që kryejnë këtë krim elektoral, bëjnë çdo gjë që të fshihen gjurmët e tij dhe të mos dalë.
Megjithatë kamerat e qytetarëve syçelët kanë filmuar momentin kriminal të ndarjes së parave për vota.
Dhe kjo jo të themi pas Dajtit apo në Mokër apo në Tropojë apo në zonat më të largëta.
Jo, kjo në Tiranë, në Babrru dhe urdhëroni videon që do u paraqes sot para jush,” tha Sali Berisha duke sjellë fakte të pakundërshtueshme që delegjitimojnë plotësisht qeverinë e dalë nga zgjedhjet e 11 Majit:

“Pra, siç e shihni, nuk mjaftuan 76 milionë euro të shpërndara publikisht. Nuk mjaftuan 200 milionë euro gjoba dhe kamata të falura. 500 milionë euro prokurime dhe koncesione. Por kalojnë duke shpërndarë para nëpër qoshe për të blerë vota.

Këto zgjedhje nuk njihen kurrë. Këto zgjedhje janë farsë dhe nuk janë zgjedhje. Pra kjo farsë nuk njihet kurrë.
Ndaj dhe ne paraqesim para medieve, para shqiptarëve dhe para komunitetit ndërkombëtar, fakte të pakundërshtueshme të farsës që delegjitimojnë plotësisht qeverinë e dalë nga zgjedhjet.
Ishte shumë demonstrues ky rast sepse është shumë e rrallë të kapësh ndarjen e parave.
Po ja që është evident. Këta janë të njohur si persona. Gjithçka është e identifikuar,” tha lideri i opozitës duek shtuar se personazhet në video janë identifikuar si eksponentë të thekur të Partisë Socialiste.

“Personazhet në video janë të identifikuar plotësisht. Janë eksponentë të thekur të PS.
Të bëjmë një marrëveshje: A mund të quhen zgjedhje, zgjedhjet në të cilat shteti, i quajtur shtet, përdor të gjithë financat e tij për të blerë vota?
Përdor të gjithë fuqinë ekzekutive, me leje, me licenca, etj, për të blerë vota.
A mund të quhen zgjedhje ato në të cilat shteti licencon mbjelljen e 29 mijë hektarë kanabis nga 200 hektarë që parashikon ligji çdo vit?
A mund të quhen zgjedhje?
Se duhet të bëjmë një marrëveshje fjale.
A mund të quhen zgjedhje kur shteti përdor në kundërshtim me ligjin 500 milionë euro prokurime?
Kur shteti në kundërshtim me ligjin jep peshqesh 100 euro në kulmin e fushatës. Fal 200 milionë euro.
Po marr vetëm këto, për të mos thënë pastaj ndikimin e tmerrshëm të karteleve. Pra, unë po flas çarë është shteti,” tha Kryetari i Partisë Demokratike, Sali Berisha duke i dhënë fund dhe manipulimit mediatik që bëjnë mediat në shërbim të Edi Ramës mbi denoncimet e liderit të opozitës:

“Narkoshteti është akoma më i zi. Sepse ju e patë, si e ndjeni ju veten si qytetare kur përfaqësoheni nga Sara Mile, e cila del nga anonimati me 20 e ca mijë vota?
Mund të përfaqësojë ajo një njeri të ndershëm, pavarësisht nga bindjet politike?
Si e ndjen veten qytetari kur përfaqësohet nga Arkend Balla, i cili nga viti 2021 në vitin 2025 ka dhjetëfishim të votave? Se ishte i lirë në vitin 2021 dhe u kap në vitin 2025.

Pra, nuk është problemi këtu as i imi si politikan, as i juaji si gazetare. Është problemi si qytetarë.
Çfarë mund të thotë qytetari për këto? Po kjo është jo vetëm farsë, por një farsë poshtëruese që shqiptarët nuk do e pranojnë.”