Dështimi i 35-të i konstituimit të Parlamentit të Kosovës ka emër!
Dështoi edhe për herë të 35-të përpjekja për konstituimin e legjislaturës së nëntë të Parlamentit të Kosovës, duke konfirmuar përfundimisht edhe dështimin e qytetarëve të Kosovës për të zgjedhur 120 deputetë normal që do të përfaqësojnë interesat e tyre. Në të gjitha 35 rastet kanë votuar vetëm 52 deputetë, 51 për dhe 1 kundër, dhe janë 68 deputetë që vazhdojnë të mos e kuptojnë pse kanë marrë përsipër të jenë përfaqësues të popullit në këtë tempull që është përdhosë nga vetë ata.
Edhe sot Kryesuesi i seancës, Avni Dehari, kërkoi sërish nga subjektet politike parlamentare të cilat nuk i kanë propozuar emrat për anëtarë të komisionit zgjedhor për zgjedhjen e Kryetarit të Parlamentit që ta bëjnë këtë, por propozime nuk pati.
Nga 94 deputetë prezentë në seancë prej të cilëve 51 votuan për, 1 kundër dhe asnjë abstenim, u konfirmua qëndrimi i pandryshuar i partive parlamentare ku deputetët tjerë nuk morën fare pjesë në votim, sërish duke mos u arrit formimin e Komisionit për votim të fshehtë për zgjedhjen e Kryetarit të Parlamentit.
Kryesuesi i seancës Avni Dehari njoftoi se seanca ndërpritet për të vazhduar të hënën, 23 Qershor, me fillim në ora 11:00.
Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.
Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.
