Rregullat më nuk ekzistojnë, Vuçiç: SHBA ka shkelur të drejtën ndërkombëtare!

Pas takimit të kolegjiumit të zgjeruar të Shefit të Shtabit të Përgjithshëm, Presidenti i Serbisë, Aleksandar Vuçiç, tha se takimi i sotëm ishte njëri ndër më të rëndësishmit, për ndryshimet e ardhshme në Ushtrinë Serbe pasi sot bota funksionon pa të drejta, drejtësi dhe asnjë rregull. Me këtë rast ai foli dhe për temën më aktuale, konfliktin mes Iranit dhe Izraelit, si dhe reagimin e Shteteve të Bashkuara.

“Serbia ka ndryshuar doktrinën e saj ushtarake. Sipas doktrinës së re, ushtria jonë duhet të jetë pakrahasimisht më e fortë. Vitin e kaluar kemi bërë shumë për të modernizuar dhe avancuar ushtrinë tonë. Sot jetojmë në një botë ku ligji dhe drejtësia kanë kohë që kanë pushuar së ekzistuari dhe tani edhe rregullat janë zhdukur. Ne duhet ta pranojmë dhe ta kuptojmë këtë,” tha Vuçiç duke shtuar se është shumë e vështirë për t’u kuptuar dhe pranuar, raporton e përditshmja serbe Blic.

“Por ne duhet ta bëjmë. Të qenit anëtar i Kombeve të Bashkuara, duke pasur integritet territorial të garantuar në bazë të vendimeve të OKB-së, sot kjo nuk do të thotë më asgjë. Fuqitë e mëdha e shkelin brutalisht atë kur u përshtatet, duke shpikur disa parime të reja, inekzistente. Ne duhet të përshtatemi edhe me këtë. Ne duhet të rrisim nivelin e aftësive tona mbrojtëse të Serbisë,” tha ai duke theksuar se kjo nuk ka të bëjë me “kotësinë e shteteve”, siç e përshkruajnë disa analistë zviceranë.

“Kjo ka të bëjë me interesat më të larta të qytetarëve të Serbisë – që ata të jenë të mbrojtur, të sigurt dhe të shkujdesur. Prandaj, ne kemi analizuar disa gjëra. Për herë të parë kam edhe disa lajme të mira sa i përket fuqisë punëtore. Jam jashtëzakonisht i lumtur për këtë. Për herë të parë kemi një përgjigje më të lartë për njësi të ndryshme nga sa prisnim”, tha Vuçiq.

“SHBA ka shkelur të drejtën ndërkombëtare”

Duke folur për luftën mes Izraelit dhe Iranit, Vuçiç ka trajtuar edhe qëndrimin e Serbisë ndaj këtyre vendeve.

“Të dy kombet janë miqësore me ne. Ne duam paqe dhe nuk e kuptoj pse nuk ka pasur përpjekje për të zgjidhur gjithçka në rrugë diplomatike. Për të qenë konkret, sepse njeriu duhet të jetë i sinqertë me veten dhe vendin e tij, ne duam marrëdhëniet më të ngushta me Shtetet e Bashkuara, një partneritet strategjik. Ne jemi një vend i vogël. Por a e shkelën SHBA-të të drejtën publike ndërkombëtare? Absolutisht po,” tha Vuçiç duke shtuar se Serbia për këtë ka folur edhe në raste të tjera.

“Nuk ka të drejta, nuk ka drejtësi. Dhe, ç’është më e rëndësishmja, sot nuk ka as rregulla. Dhe tani për t’iu përgjigjur pyetjes suaj: si do t’i flasë Perëndimi tani Rusisë apo kujtdo tjetër, për shkeljen e integritetit territorial? Ju të gjithë tashmë e keni nëpërkëmbur atë. E keni shkelur atë në shembullin e Serbisë dhe RFJ-së. Por shumë e kanë harruar, ishte 26 vite më parë. Kjo po ndodhë tani në sy të të gjithëve. Po ciilat janë parimet? Cilat janë rregullat sipas të cilave ata ndonjëherë do të jenë në gjendje të bien dakord për paqen në botë? Pse flas për këtë çështje? Sepse po futemi në kaos të plotë. E gjithë bota. Çmimi i naftës sot është 25 për qind më i lartë se dhjetë ditë më parë. Në pikat e karburantit çmimet po i mbajmë me dhunë që të mos shpërthejnë. Brenti në mëngjesi u hap me 78.4. Ishte 64. Dhe, këtu nuk është fjala vetëm për çmimin e naftës. Çmimi i gazit shkoi në qiell. Këtu nuk është më vetëm çështje çmimi,” tha Vuçiç ndërsa u përgjigj edhe në pyetjen për eksportin e municioneve në Izrael tha se gjithçka është ndalur pas fillimit të luftës në Iran..

“Ne shesim municion, 24.000 njerëz jetojnë drejtpërdrejt prej tij dhe 50.000 indirekt. Me anëtarë të familjes, janë rreth 150.000 njerëz në këtë vend. Unë nuk do të lë pa bukë 150.000 njerëz. Përkundrazi, puna ime si president është të hap tregje për ta. Dhe unë i kam hapur pothuajse të gjitha tregjet aziatike. Edhe tregjet amerikane,” tha Presidenti i Serbisë, Aleksandar Vuçiç, duke saktësuar se Serbia që 15 vjet eksporton municione.