Video/Realizohet fluturimi i parë i taksisë elektrike fluturuese. Së shpejti fluturon mbi Dubai?
Banorët e Dubait së shpejti do të mund të shmangin bllokimet e trafikut me taksi ajrore. Joby Aviation kreu fluturimin e parë provë të një taksie ajrore tërësisht elektrike këtë javë, një moment i rëndësishëm në përpjekjet e qytetit për të integruar transportin ajror në rrjetin e saj ekzistues të lëvizshmërisë që në fillim të vitit të ardhshëm.
Joby shpreson që taksitë e saj ajrore do të lehtësojnë presionin mbi transportin ekzistues tokësor dhe do t’u ofrojnë pasagjerëve një alternativë më të shpejtë, ndërsa Dubai përballet me mbingarkesën në rritje.
“Ne duam të ndryshojmë mënyrën se si njerëzit të udhëtojnë në punë,” tha CEO i Joby në Emiratet e Bashkuara Arabe, Anthony Khoury.
12 minuta me taksi fluturuese në vend të 45 minutave me makinë
Një udhëtim nga aeroporti kryesor i Dubait në arkipelagun Palm Jumeirah do të zgjasë rreth 12 minuta me taksi, parashikon kompania, krahasuar me 45 minuta me makinë.
Ndërsa ambicia afatgjatë e Jobyt është që taksitë ajrore të jenë të përballueshme për të gjithë, thotë Khoury, ata pranojnë se në fillim çmimet do të jenë për udhëtarët me të ardhura më të larta.
“Ashtu si me çdo teknologji të re, ditët e para mund të jenë prestigjioze.”
Fluturimi provë u zhvillua në shkretëtirë
Fluturimi demonstrues u zhvillua të hënën në një vend të izoluar në shkretëtirë në juglindje të qendrës së Dubait dhe ishte projektuar për të imituar një udhëtim tipik me taksi ajrore, sipas Joby Aviation.
Në një ceremoni ku ishin prezentë zyrtarë të lartë qeveritarë, drejtues të transportit dhe përfaqësues të kompanisë, avioni eksperimental kreu një ngritje vertikale, fluturoi disa kilometra, pastaj u kthye dhe u ul vertikalisht.
Taksi ajrore Joby, avioni kryesor elektrik për ngritje dhe ulje vertikale, eVTOL, i zhvilluar nga kompania me seli në Kaliforni, mund të fluturojë deri në 160 kilometra me shpejtësi që arrijnë 320 km/orë.
“Shpresojmë që njerëzit mezi do ta vënë re”
Plotësisht elektrike, me zero emetime operative, taksia ajrore e Jobyt është projektuar të jetë miqësore me mjedisin dhe mjaftueshëm e qetë për përdorim komercial në zona të dendura urbane.
“Do të fluturojë në qytet, duke kaluar nëpër zonat e banuara, dhe shpresojmë që njerëzit mezi do ta vënë re,” tha Khoury.
Kompania planifikon të lançojë një shërbim taksie ajrore komerciale në Emirate në vitin 2026, me katër porte fillestare të vendosura në Aeroportin Ndërkombëtar të Dubait – DXB, Palm Jumeirah, Qendrën e Dubait dhe Qendrën e Biznesit Dubai Marina.
