Mbi 80 njerëz të vdekur dhe dhjetëra të zhdukur nga përmbytjet në Texas

Së paku 81 persona u konfirmuan të vdekur në Texasin qendror, ndërsa 41 të tjerë janë ende të zhdukur pas përmbytjeve të së premtes.

Gjashtëdhjetë e tetë nga viktimat, përfshirë 28 fëmijë, u regjistruan në Qarkun Kerr, ku një kamp vajzash buzë lumit u përmbyt, raporton RFE.

Dhjetë vajza dhe një këshilltar nga kampi Mystic nuk janë gjetur ende.

Zyrtarët thonë se numri i viktimave me siguri do të rritet.

Në 24 deri në 48 orët e ardhshme, në rajon priten stuhi të tjera, që mund ta vështirësojnë edhe më shumë punën e ekipeve të shpëtimit.

Ato tashmë janë duke u përballur me rreziqe – si nga gjarpërinjtë helmues – derisa vazhdojnë kërkimet mes baltës dhe rrënojave.

Guvernatori i Texasit, Greg Abbott, tha të dielën se autoritetet do të bëjnë gjithçka që është e mundur, për të gjetur çdo person që ende mungon.

“Ishte e tmerrshme të shihje se çfarë përjetuan ata fëmijë të vegjël”, tha Abbott, një ditë pasi vizitoi zonën.

Presidenti Donald Trump dje firmosi një deklaratë për gjendje të jashtëzakonshme në Qarkun Kerr, duke aktivizuar kështu Agjencinë Federale të Menaxhimit të Emergjencave në Texas ndërsa u shpreh se mund ta vizitojë këtë shtet të premten, raporton RFE.

“Po punojmë nga afër me përfaqësuesit nga Teksasi dhe është një gjë e tmerrshme ajo që ka ndodhur – absolutisht e tmerrshme,” tha Trump.

Në Romë, Papa Leoni XIV bëri lutje të veçanta për viktimat në Teksas.