Në pikat e kalimit në Maqedoni të Veriut, në Tabanovc pritja 30 minuta, në Bogorodicë 40 minuta

Intensiteti i trafikut në rrugët jashtë zonave urbane është rritur. Për shkak të pushimeve verore, ka një frekuencë të shtuar të automjeteve, në pikën kufitare Tabanovc ku koha e pritjes për hyrje dhe dalje nga vendi është rreth 30 minuta, ndërsa në pikën kufitare Bogorodicë koha e pritjes për hyrje në vend është rreth 40 minuta.

Lidhja Automoto e Maqedonisë Veriut, LAMM, raporton se në pikat e tjera kufitare në anën maqedonase nuk ka vonesa më të gjata për hyrje dhe dalje nga vendi ndërsa rekomandon përshtatjen e shpejtësisë së lëvizjes, respektimin e sinjalistikës së vendosur të trafikut dhe drejtimin e kujdesshëm të automjeteve, veçanërisht në rrugët nëpër lugina, lugina lumenjsh dhe gryka, ku ekziston mundësia e rrëshqitjeve të dheut. Kjo vlen veçanërisht për seksionet Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë, raporton Alsat-M.

Ndërkohë LAMM rikujton se duke filluar nga 1 korriku deri më 31 gusht, në rrugët nacionale në Maqedoni të Veriut është futur regjimi i përkohshëm veror i trafikut, i cili ndalon lëvizjen e mjeteve të rënda mallrash me mbi 15 ton, gjatë fundjavave dhe në ditët me temperatura jashtëzakonisht të larta.

– E premte nga ora 17:00 deri në 22:00, 

– Të shtunën nga ora 09:00 deri në 18:00 dhe

– E diel nga ora 09:00 deri në orën 22:00.

Në ditët me temperatura jashtëzakonisht të larta, të përcaktuara nga Ministria e Shëndetësisë, ndalimi do të zbatohet edhe nga e hëna në të enjte nga ora 11:00 deri në ora 17:00.