Të hënën në SHBA, Zelenskyy: Do të flas me Trumpin për përfundimin e luftës
Presidenti ukrainas Volodymyr Zelenskyy sot bëri të ditur se të hënën do të takohet me Presidentin e Shteteve të Bashkuara, Donald Trump, në Washington, ku do të diskutojnë për zgjidhjen e konfliktit në Ukrainë, pas takimit të presidentit amerikan me homologun e tij rus Vladimir Putin.
Presidenti amerikan foli gjithashtu me udhëheqësit e NATO-s pas takimit me Putinin në Alaska, tha Shtëpia e Bardhë, dhe zhvilloi bisedime telefonike gjatë kthimit të tij në Washington, duke mbërritur në orët e para të mëngjesit të së shtunës.
We had a long and substantive conversation with @POTUS. We started with one-on-one talks before inviting European leaders to join us. This call lasted for more than an hour and a half, including about an hour of our bilateral conversation with President Trump.
— Volodymyr Zelenskyy / Володимир Зеленський (@ZelenskyyUa) August 16, 2025
Ukraine reaffirms… pic.twitter.com/64IPVhtFaB
Përmes rrjetit social X, Zelenskyy tha se Trump e informoi sot gjatë një bisede telefnike mbi pikat kryesore të bisedës së tij me presidentin rus në Alaskë.
“Ishte një bisedë e gjatë, fillimisht midis Presidentit Zelensky dhe Trump, dhe më pas atyre iu bashkuan udhëheqës evropianë,” tha zyra e presidentit ukrainas.
Liderët evropianë të përfshirë në bisedime
Presidentja e Komisionit Evropian Ursula von der Leyen ishte midis atyre që morën pjesë në këtë bisedë telefonike, në të cilën Trump informoi liderët evropianë mbi samitin, tha zëdhënësi i Von der Leyen.
Një zyrtar i NATO-s tha se Sekretari i Përgjithshëm i NATO-s, Mark Rutte, gjithashtu mori pjesë, ndërsa Pallati Elysee konfirmoi pjesëmarrjen e Presidentit Francez Emmanuel Macron.
Bisedës telefonike iu bashkuan liderët nga Gjermania, Finlanda, Polonia, Italia dhe Mbretëria e Bashkuar, saktësoi Komisioni Evropian.
Rezultatet e Samitit Trump-Putin
Samiti i shumëpritur në Alaskë nuk prodhoi një marrëveshje ose armëpushim në agresionin e Rusisë kundër Ukrainës, megjithëse si Trump ashtu edhe Putin i përshkruan bisedimet si produktive para se të ktheheshin në shtëpi.
Gjatë një paraqitjeje të shkurtër për mediat pas takimit prej 2 orë e 45 minutash, të dy udhëheqësit thanë se kishin bërë përparim por nuk saktësuan se në cilat çështje.
Pas takimit, në një intervistë për Fox News, Presidenti amerikan Donald Trump tha se ishte “një gjë e madhe” që pengoi një marrëveshje përfundimtare, por nuk pranoi të jepte detaje.
“Mendoj se ai dëshiron që lufta të mbarojë,” tha Trump, pa zbuluar pikën e mosmarrëveshjes për të cilën ata nuk mund të binin dakord. Ai e vlerësoi Putinin për dakordësinë me pretendimin e tij se lufta në Ukrainë “nuk do të kishte ndodhur kurrë” nëse ai do të kishte qenë në krye të Shteteve të Bashkuara në kohën e pushtimit rus.
Ndryshe, gjatë fushatës presidenciale dhe pas marrjes së detyrës, Donald Trump tha se do t’i jep fund shpejt luftës në Ukrainë që filloi me pushtimin rus në vitin 2022, por deri më tani kjo zgjidhje mbetet vetëm premtim.
