Të interesuarit për t’u regjistruar si votues jashtë Kosovës, në mënyrë që të mund të votojnë përmes postës në zgjedhjet për kryetarë të komunave dhe për kuvendet komunale të 12 Tetorit, kanë afat të regjistrohen deri më 29 gusht.
Komisioni Qendror i Zgjedhjeve ka bërë të ditur se nga data 23 korrik deri më sot, përmes platformës elektronike https://diaspora.kqz-ks.org janë pranuar gjithsej 9.961 aplikime për regjistrim për votim me postë, prej të cilave janë aprovuar 7.681, ndërsa 2.280 janë refuzuar.
Zëdhënësi i KQZ-së, Valmir Elezi, tha se shumica e aplikimeve të refuzuara kanë qenë për shkak se aplikuesit nuk kanë paraqitur dëshmi për adresën e tyre jashtë Kosovës.
“KQZ po i informon individualisht të gjithë aplikuesit e refuzuar për arsyet e refuzimit dhe u ofron mundësinë për riaplikim duke bashkëngjitur dokumentet e nevojshme, në përputhje me udhëzimet e KQZ-së,” tha Valmir Elezi.
Sipas KQZ-së, votimi përmes postës do të nisë më 17 shtator dhe do të përfundojë më 11 tetor 2025. Ky proces do të jetë i vlefshëm për votuesit që arrijnë të regjistrohen deri më 29 gusht.