Video/ Trafik armësh nga Kosova në Shqipëri, arrestohet 41-vjeçari në Lezhë

Një 41-vjeçar është arrestuar nga policia e Lezhës, pasi ishte shpallur në kërkim në kuadër të operacionit të koduar “Puzzle”, i zhvilluar rreth tre muaj më parë.

Në pranga përfundoi, Ritvan Keqi, për shkak të pjesëmarrjes në grupin i cili trafikonte armë nga Kosova në Shqipëri.

Njoftim

Në vijim të punës për kapjen e shtetasve të shpallur në kërkim dhe vënien e tyre përpara përgjegjësisë ligjore, shërbimet e Seksionit të Mbështetjes Operacionale të Hetimit, në DVP Lezhë, si rezultat i një pune të mirorganizuar, kapën dhe vunë në pranga shtetasin:

R. K., 41 vjeç, banues në Fushë Kuqe, Kurbin.

Ky shtetas ishte shpallur në kërkim nga DVP Tiranë, në kuadër të operacionit të koduar “Puzzle”, i zhvilluar rreth 3 muaj më parë, për goditjen e trafikimit të armëve të zjarrit nga Kosova në Shqipëri. Në kuadër të këtij operacioni janë sekuestruar 14 armë zjarri.

Veprimet e tjera procedurale për shtetasin R. K. do të kryhen nga DVP Tiranë.

Materialet procedurale i kaluan Prokurorisë, për veprime të mëtejshme.