Sërish shpërblehet dashuria e Serbisë ndaj Rusisë, SHBA nuk sanksionon Industrinë Serbe të Naftës
Administrata amerikane ka shtyrë për herë të gjashtë zbatimin e sanksioneve kundër Industrisë Serbe të Naftës, NIS, të cilat janë pjesë e paketës ndëshkuese të sanksioneve amerikane kundër sektorit të energjisë ruse, dhe shtyrja e re është në fuqi deri më 29 shtator, njoftoi sot Ministria Serbe e Energjisë.
NIS i ka dërguar një kërkesë të re Departamentit të Thesarit të SHBA-së për një licencë të veçantë që shtyn zbatimin e plotë të sanksioneve amerikane në mënyrë që të sigurojë funksionimin përtej 27 gushtit, kur skadon afati i caktuar për licencën e mëparshme.
Pjesa e pronësisë së Gazpromit rus zvogëlohet
Ndërkohë, Gazprom Njeft rus ka ulur pjesën e aksioneve të pronësisë në NIS në 44 për qind, dhe me këtë transaksion, baza për sanksione kundër kompanive të sektorit të energjisë me kapital shumicë rus pushoi zyrtarisht.
Pas futjes së sanksioneve, struktura e pronësisë u ndryshua pjesërisht, me Gazprom Njeft të Rusisë që transferoi 5 për qind të akasioneve te Gazprom, duke pasur parasysh se kompania e gazit nuk është nën sanksione.
Me këtë transaksion, Gazprom Njeft uli pjesën e saj të pronësisë në NIS në një përpjekje për të shmangur sanksionet ndaj NIS në Serbi, dhe për të konfirmuar se politika e Aleksandar Vuçiçit për të mos respektuar sanksionet e vendosura të SHBA ndaj Rusisë ishin të drejta, për dallim nga shtetet tjera që u dëmtuan shumë pse respektuan vendimin e administratës amerikane dhe nuk u furnizuan me naftën ruse.
Vlenë të theksohet se Aleksandar Vuçiç krijoi përshtypjen se kishte guxim të madh kur nga Porti i Tivarit u transferua në Portin e Durrësit për tu furnizuar me naftë ruse, dhe për këtë shërbim falënderoi “vëllain” e tij prej sorosi, Edi Rama; Por, siç duket, për Vuçiçin pak rëndësi ka kush e drejton administratën amerikane, Soros apo Trump, ai do të vazhdoj tregtinë me Moskën!
Ndryshe, Qeveria serbe ia shiti NIS kompanisë ruse Gazprom Njeft në vitin 2008, dhe sipas të dhënave nga Regjistri Qendror i Letrave me Vlerë, Gazprom Njeft dhe Gazprom kanë 56.15 për qind të pronësisë, ndërsa 29.87 për qind është në pronësi të Serbisë.
Drejtori i kompanisë publike “Srbijagas”, Dushan Bajatoviç, vlerësoi dje se furnizimet me karburant në Serbi janë “të mjaftueshme për gjashtë deri në tetë muaj” dhe se “nuk ka rrezik për tronditje çmimesh ose mungesë nafte”.
Një litër benzinë kushton mesatarisht 1.51 euro, nafta është 1.62 euro, dhe Euro-gazi është 77 eurocent.
