Suedi, gruaja e re siriane kërkon divorc, burri e mbyt me urdhër të nënës
Dy të dënuar me burg të përjetshëm është vendimi i një gjykate në qytetin suedez të Eskilstunës për vrasjen e një gruaje 27-vjeçare siriane e cila donte vetëm të divorcohej nga burri i saj.
Familja e burrit të saj, gjithashtu siriane, vendosi që ajo duhet të vdiste për këtë. Ishte një tjetër rast i të ashtuquajturit krim nderi, raporton Aftonbladet.
7 familjarë të dënuar për vrasje
Një total prej shtatë anëtarësh të familjes u dënuan për pjesëmarrje në mënyra të ndryshme në vrasjen e nënës së dy fëmijëve.
Me burgim të përjetshëm u dënuan burri i gruas, Mohammed Osman, 37 vjeç, për kryerjen e vrasjes, dhe, nëna e tij, Saila Bakar, 55 vjeç, për nxitje të vrasjes. Ishte vjehrra ajo që vendosi që nusja e saj duhet të vdiste.
Kunati i gruas 27-vjeçare të vrarë u dënua me 12 vjet burg për ndihmë dhe inkurajim në vrasje dhe fshehje të rëndë të autorit. Katër anëtarë të tjerë të familjes u dënuan me dënime më të lehta për fshehje të rëndë të autorit të krimit. Të gjithë e kanë mohuar fajësinë.
Gjykata e Eskilstunës beson se një pjesë e motivit për vrasjen ishte “rivendosja e nderit të familjes”.
Hetimi
Hetimi zbuloi se gruaja po përpiqej me dëshpërim ti jepte fund martesës. Ajo donte të vazhdonte studimet dhe të jepte provimin për drejtimin e makinës. Mbi të gjitha, ajo donte të jetonte një jetë të lirë. Jeta që ajo jetoi, besojnë hetuesit, ishte gjithçka tjetër përveç se një jetë në liri.
Ajo u martua me kushëririn e saj kur ishte vetëm 17 vjeç. Pas kësaj, çifti sirian u zhvendos në Suedi, ku jetonte familja e burrit të saj. Në Suedi, ata patën dy fëmijë. Por marrëdhënia u shoqërua me dhunë dhe normat e forta të nderit. Familja e burrit të saj dyshohet se besonte se gruaja 27-vjeçare nuk po jetonte jetën që duhej. Ajo shihte shumë shoqe dhe nuk vishte rroba të përshtatshme.
Gruaja vazhdimisht raportonte si burrin e saj ashtu edhe vjehrrin e saj për dhunë fizike dhe kërcënime me vdekje, por çdo herë ajo më vonë e tërhiqte padinë, ndoshta për shkak të kërcënimeve dhe shantazhit nga familja e burrit të saj.
Ajo kërkoi divorc disa herë, por burri i saj dhe familja e tij nuk e lejuan.
“Burri nuk e pranoi, familja nuk e pranoi, ata e detyruan të ndiqte rregullat dhe normat e tyre”, thotë detektivi Anders Lindstrand nga Departamenti i Hetimit të Krimeve të Rënda në Södermanland.
