Ambasadori amerikan në NATO: SHBA do stabilitet në Ballkanin Perëndimor!

Ambasadori amerikan në NATO, Matthew G. Whitaker, tha se Shtetet e Bashkuara po ndjekin nga afër situatën në Serbi dhe në entitetin Republika Srpska të Bosnje Hercegovinës, me synimin që të mos lejohet asnjë zhvillim që mund të çojë në konflikt rajonal.

“Po ndjekim me shumë kujdes gjithçka që po ndodh si në Republikën Srpska, ashtu edhe në Serbi. Aktualisht, jemi të përqendruar që situata të mos shndërrohet në një konflikt të mundshëm rajonal,” tha Ambasadori Whitaker në një nga panelet e Forumit Strategjik të Bledit duke tehskuar qartë se SHBA do stabilitet në Ballkanin Perëndimor dhe kjo, siç tha, është e rëndësishme edhe për partnerët evropianë brenda NATO-s, të cilët e kanë detyrim të veprojnë së bashku në situata krize.

Serbia ka qenë prej muajsh e përfshirë nga protestat antiqeveritare, të cilat shpesh janë shndërruar në episode dhune, ndërsa presidenti Aleksandar Vuçiç, pa asnjë provë, akuzon agjitatorë të huaj për përpjekje për të nxitur revolucion.

Në Republikën Srpska, Milorad Dodik sfidon vendimin e Gjykatës së Bosnje Hercegovinës për t’ia hequr mandatin presidencial pas një dënimi dhe vazhdimisht kërcënon me ndarjen e këtij entiteti nga pjesa tjetër e Bosnjes.

I pyetur nëse NATO do të ndërhynte, nëse kriza politike do të përshkallëzohej në një konflikt të armatosur, sidomos në Bosnje Hercegovinë, por edhe në Serbi, Whitaker tha se NATO vepron me unanimitet, por shtoi se jemi shumë larg diçkaje të tillë.

“Nëse NATO do të përfshihet… Rregulli numër 1 në politikë është të mos u përgjigjesh hipotezave. Mendoj se duhet të shohim se si do të zhvillohen gjërat,” tha Whitaker.

“Ne do të vazhdojmë t’i inkurajojmë të gjitha palët që të punojnë në përputhje me marrëveshjet e Dejtonit,” tha Ambasadori amerikan duke iu referuar marrëveshjeve që i dhanë fund luftës në Bosnje në vitet ’90 ndërsa konfirmoi:

“NATO është më e fortë se kurrë” dhe kjo duhet të jetë shumë shqetësuese për kundërshtarët tanë!”

Në pyetjen nëse presidenti amerikan, Donald Trump, mund të takohej me presidentin serb, Aleksandar Vuçiç, ose me ish-presidentin e Republikës Srpska, Milorad Dodik, Whitaker tha se për takime të tilla nuk ka asnjë paralajmërim, por se ato mund të diskutohen nëse do të kishte përfitime të qarta për paqen dhe stabilitetin.

Ai tha se presidenti Trump ka një aftësi të veçantë për të komunikuar me liderë botërorë, për të përdorur ndikimin e presidencës amerikane dhe fuqinë e shtetit, në të mirë të paqes, demokracisë, stabilitetit dhe zhvillimit ekonomik.

Nëse Trump do të vendoste të takohej me Vuçiçin ose Dodikun, tha ai, një gjë e tillë nuk do të bëhej për të forcuar pozitën e tyre politike, por vetëm nëse do të shërbente për avancimin e interesave më të gjera të paqes dhe stabilitetit.

“Sigurisht që nuk do të pranonte një takim që synon forcimin e pozicionit politik të ndonjë udhëheqësi. Kjo nuk është ajo që bën presidenti Trump,” tha Ambasadori amerikan në NATO duke e përshkruar Trumpin si paqebërës, ndërsa theksoi se politika e tij fokusohet në rezultate dhe në krijimin e mundësive për përparim./RFE/