Kroacia ktheu mbrapsht pjeshkët nga Shqipëria, AKU: U asgjësuan 5.562 kg

Autoriteti Kombëtar i Ushqimit, AKU, ka bërë të ditur se asnjë sasi e pjeshkëve shqiptare që Kroacia ktheu pas për përmbajtje të lartë nikeli nuk është shpërndarë në tregun vendas, po ashtu sasia që u eksportua tashmë është asgjësuar.

AKU sqaroi sot, një ditë pas lajmit se autoritetet kroate kthyen pas ngarkesën me pjeshkë, se sasia prej 5.562 kg është asgjësuar pas rezultatit të analizës laboratorike.

“Nga analizat e kryera në shtetin kroat, është konstatuar prania Nikel mbi normën e lejuar. Menjëherë pas marrjes së njoftimit, rasti i kaloi për ndjekje strukturave të Drejtorisë Rajonale të AKU Fier. U krye inspektim në OBU eksportues, ku rezultoi se nuk ka gjendje të produktit në magazinat e tij”, thuhet ndër të tjera në njoftim.

Njoftim për konsumatorin nga RASFF:

“Më datë 22.08.2025, Shqipëria është njoftuar nga Sistemi RASFF, në kategorinë Njoftim për refuzim në kufi me numër reference 2025.6367 me temë: “Nikel në pjeshkë me origjinë nga Shqipëria”, të njoftuar nga Kroacia.

Nga analizat e kryera në shtetin kroat, është konstatuar prania Nikel mbi normën e lejuar.

Menjëherë pas marrjes së njoftimit, rasti i kaloi për ndjekje strukturave të Drejtorisë Rajonale të AKU Fier.

U krye inspektim në OBU eksportues, ku rezultoi se nuk ka gjendje të produktit në magazinat e tij.

Subjekti disponon sistem gjurmueshmërie, ku u verifikua se produkti është dërguar i gjithi për eksport dhe nuk është shpërndarë në tregun vendas.

Sasia prej 5562 kg pjeshkë janë dërguar drejt Kroacisë, ku dhe janë asgjësuar pas rezultatit të analizës laboratorike. Rasti iu referua dhe AKVMB për masa të mëtejshme.

AKU ka bërë edhe njoftimin përkatës mbi rezultatet e verifikimeve në kategorinë e njoftimeve RASFF”.