Shqipot gjenial, në turizmin e Thonjëpaprerit!
nga Agim Popoci
Nga thellësia e shpirtit antikosovar, Kryeministri i Qet Kastratit, Samir Manes e gjithë Shqipërisë, Edi Rama, nxori dhe një acid të voçkël nga tëmthi i tij sllav duke konstatuar se janë Shqipot e Kosovës dhe Maqedonisë së Veriut, ata që e bëjnë pis bregdetin shqiptar!
Në morinë e ofendimeve që nxjerrë nga zorrët e gojës njeriu që ushqehet me çorbën e batonëve dhe buzhalëve, një njeri normal nuk duhet të pres fjalë të mira edhe kur flet për turizmin!
Por, kur ky Thonjëpaprerë i nxjerr nga ujërat e pista të Parisit që e kemi peshqesh nga paraardhësi i tij, i papërgjegjshmi Fatos Nano, flet edhe për pastërti, ai acidi i voçkël sikur mos të jetë edhe sa thonjtë e ministres Mirela Kumbaros, të shkakton një ndjenjë ku edhe frymë merr me sëkëlldi!
Nëse Shqipot e Kosovës dhe Maqedonisë së Veriut që luftojnë me Serbinë në stadiume, siç thotë Thonjëpapreri, bëjnë pis bregdetin shqiptar, mes për mes të cilit kalojnë ujërat e zeza për t’u derdhur në të bukurin Jon edhe kur prek Maldivet Shqiptare, ata nuk janë për t’u kritikuar, jo vetëm për faktin pse bëjnë turizëm patriotik!
Ai që bënë pis plazhin më të pistë në Evropë, për të cilin kujdeset qeveria e Thonjëpaprerit, përgjegjëse edhe për renditjen e fundit të Shqipërisë në Analizën e fundkorrikut të Agjencisë Europiane të Mjedisit EEA, e cila shqyrtoi cilësinë e ujit në 22.127 pika bregdetare, liqenore dhe lumore, nuk është asgjë më pak se qenie gjeniale!
Ndërkohë të gjitha ata shqiptarë që kujdesen ose jo për ambientin e pastër dhe u prekën shumë nga fjalori i Kryeministrit të Shqipërisë së tyre të dashur, dhe nuk e kishin dëgjuar për asnjë rast në gjithë këto dekada Kryeministrin e Malit të Zi ta bëjë një akuzë të tillë për Shqipot e Kosovës dhe Maqedonisë Veriut se bëjnë pis Ulqinin, por, shteti merrte masa dhe shtonte kapacitete për mirëmbajtjen e pastërtisë në plazhe dhe jo vetëm, duhet të qetësohen dhe të presin fundin e kësaj fatkeqësie që ka goditur kombin shqiptar!
Sepse, kjo fatkeqësi nuk e ka bërë të tillë vetëm bregdetin shqiptar nga Velipoja në Ksamil, e tillë është edhe Tirana të cilën e qeverisë që 25 vjet!
E tillë është edhe Kryeministria, si Kryeqendra e plehrave, nga e cila, çdo Shqipo qoftë i Kosovës ose Maqedonisë së Veriut, sikur të jetë edhe më i ndërgjegjshmi në botë dhe nuk do që ta bëjë pis tokën shqiptare, në rastin më të mirë kur ka një copë letër në dorë, do t’i duhet ta mbajë në dorë deri tek Rekotrati, Sheshi Skënderbe, Liceu Artistik ose Blloku, sepse kosh të plehrave nuk gjenë dot!
Ndryshe, të gjithë tjerët do fajësojnë shtetin që nuk vendosin kosha plehrash, në veçanti ata që Thonjëpapreri i ka shumë për qejf dhe i shfajëson për pisllëkun sepse flasin italisht, spanjisht, anglisht etj.
Dhe, të gjithë ata Shqipo nga Kosova dhe Maqedonia e Veriut që u prekën dhe vazhdojnë e bëjnë përpjekje maksimale ta ruajnë tokën shqiptare, nuk kanë pse shqetësohen pse Thonjëpapreri i fut në një thes me ata që nuk janë asgjë tjetër vetëm se shqiptar, dhe kërkojnë kohë për shijimin e një turizmi solid, për të mos thënë elitar!
Vetëm në këtë pikë Shqipot nga cilado pikë e planetit që vijnë, nuk duhet të shqetësohen pavarësisht turizmit që propagandojnë batonë e buzhalë, fevzi e sokol, sepse ata që i ka për qejf Thonjëpapreri nuk kanë të bëjnë fare me elitë, madje janë gërdia e turizmit në Shqipëri,
Për t’u relaksuar nga ofendimet e Thonjëpaprerit të mjafton vetëm një shëtitje në Pazarin e ri të Tiranës, për të vazhduar deri Selvia!
Përveç atyre në hall që kanë ardh për turizëm shëndetësor dhe janë lehtë të identifikueshëm me hundë dhe veshë të operuar, të gjithë të tjerët janë turistë të huaj që Edi Rama i ka për qejf, por nuk janë asgjë më shumë se sa kopje e skenarit të Shqipove të Kosovës dhe Maqedonisë së Veriut kur vizitonin Beogradin, për hall, në vitet ’70-të!
Dy vajza 20 vjeçare nga Finlanda, me dy pula, dy bukë masive, dy vasketa me luleshtrydhe dhe dy shishe 2-litërsh me ujë, super të veshura, vetëm Thonjëpapreri mund ti quaj turistë të kujdesshëm për pastërtinë, por, prezenca e tyre në një bar shqiptar me gjithë këto “salltanete” mund të quhen vetëm tronditje; Sepse, pa dallim, të gjithë Shqipot banues ose jo të Tiranës, Perëndimin e mendojnë ideal vështirë të arritshëm ndërsa pisllëkun që e kanë përreth, kulturë që edhe mund të kurohet me kohën.
Ose për turistët italianë që i ka aq shumë për zemër Thonjëpapreri dhe i prezanton si e ardhmja e turizmit shqiptar! Mirazhin e një italiani ose spanjolli të mirë mund ta ruash vetëm nëse nuk kalon nëpër Rrugën e Saraçëve, ku nga dera e dyqanit Kazazi pafund del ky lloj turisti me dhjetëra Sallamë dhe Kaçkavall në duar! Jo, nuk është nga Etopia, por nuk është as turistë elitar, dhe i tillë nuk shkel në shtetin e qeverisur nga Thonjëpapreri, me përjashtim të zyrtarëve të Brukselit që vijnë për punë!
Në fund, të gjithë ata që vazhdojnë dhe pyesin veten se si i duhet dhënë përgjigja këtij njeriu i cili vazhdon dhe shpreh aq shumë urrejtje për të gjithë shqiptarët që jetojnë mbi Fushë Krujë, këtë fundjavë Shqipot e Kosovës dhe Maqedonisë Veriut i dhanë përgjigje ideale me lumin e makinave që vërshuan drejt bregdetit shqiptar, jo për t’ia bërë pis plazhin por për t’i bërë të qartë Kryeministrit të Qet Kastratit, Samir Manes e gjithë Shqipërisë, se kot e ka me ofendimet dhe urrejtjen e tijë, ashtu siç e pati kot Miladin Popoviçi, Duash Mugosha dhe këlyshi i tyre, Enver Hoxha!
E shqipove që nuk po ju lëviz as qerpiku në tokën shqiptare që vazhdon e kullon gjak dhe lot vuajtjesh nga komunistët, dhe nën hije rrinë e kuvendojnë, pika që s’ju bije që në regjimin e Thonjëpaprerit rrojnë!
