Komentet e LVV në Kushtetuese, Haxhiu: Nuk e votojmë asnjë kandidat të Listës Serbe

Duke bërë të ditur dorëzimin e komenteve të LVV lidhur me kërkesën e Listës Srpska në Gjykatën Kushtetuese, Nënkryetarja e Parlamentit të Kosovë, Albulena Haxhiu, e bëri të qartë se Lëvizja Vetëvendosje nuk e voton asnjë kandidat të Listës Srpska derisa vendi ka nevojë për një qeveri të re ose zgjedhje të reja.

“Shteti ynë është shtet unitar e jo multietnik. Ky model është rregullator i Republikës sonë demokratike në shteti tonë të shpallur në vitin 2008, asnjë grup etnik, shoqëror apo gjinor nuk e ka të drejtën e vetos përmbi organet tona që sfidojnë Republikën. Ne qytetarët e kësaj republike jemi palë të barabarta,” tha Albulena Haxhiu duek shtuar se pavarësisht dallimeve që kanë me partitë opozitare, ata duhet të bëhen bashkë në mbrojtjen e shtetit kundrejt një subjekti politik që nuk e njeh Republikën e Kosovës dhe e lufton atë”.

“Mendoj që secili deputet i Kuvendit, secili subjekt, sidomos partitë shqiptare ka qenë e rëndësishme të dërgojnë komente në Kushtetuese. Pavarësisht dallimeve që ne kemi, është e rëndësishme ta mbrojmë shtetin tonë kundrejt një subjekti politik që nuk e njeh Republikën e Kosovës e lufton atë dhe tenton të bllokojë funksionimin demokratik të institucioneve të Republikës,” tha Haxhiu duke akuzuar opozitën se ata nuk i siguruan 5 vota që ta zgjidhnim deputetin Nenad Rashiq nënkryetar të Kuvendit.

“Teksa opozitarët hedhin akuza të vazhdueshme në drejtim të LVV-së, do të ishte e rëndësishme që në këtë betejë të ishim bashkë, por vetë fakti që ata nuk i siguruan 5 vota që ta zgjidhnim deputetin Nenad Rashiq nënkryetar të Kuvendit, është i mjaftueshëm për të kuptuar pozicionin e partive politike dhe për të kuptuar se kush sot e bën avokatin e Listës Serbe. Për ne ka qenë e papranueshme masa që ka marrë Gjykata Kushtetuese, sidomos në afat prej 25 ditësh, është kohë shumë e gjatë, vendi ka nevojë për një qeveri dhe ne duhet ët ecim përpara, ose me qeverinë e re që është në plotni me qëndrimin tonë politik ose me zgjedhje të reja.”

Haxhiu: Nuk e votojmë asnjë kandidat të Listës Serbe

Me këtë rast, Albulena Haxhiu e tha qartë se Lëvizja Vetëvendosje nuk e voton asnjë kandidat të Listës Srpska dhe nuk ka gjykatë që mund t’i thotë një partie politike se patjetër duhet të votosh për atë person.

“Sa i përket kandidatëve të Listës Serbe, unë këtu e them, asnjërin nga deputetët e Listës Serbe nuk do ta votojmë. Lista Serbe nuk është dashur as të certifikohet, ne edhe aso kohe e kemi kundërshtuar certifikimin. Fatkeqësisht i kemi 9 deputet të tyre në Kuvend e fatmirësisht nuk i kemi dhjetë, e kemi një deputet që e njeh Republikën, Nenad Rashiqin, sepse pas sa viteve është bërë ky ndryshim dhe 9 të tjerë që nuk e njohin Republikën. Dhe siç e kam thënë, kryetari formal i tyre Milan Radoiçiç është strehuar në Serbi dhe është përgjegjës për sulmin terrorist në Banjksë dhe jo vetëm, për shumë sulme që kanë ndodhur ndaj policisë, KFOR-it, gazetarëve, qytetarëve dhe shumë krime tjera,” tha Nënkryetarja e Parlamentit, dhe për këtë LVV nuk do të votojë  asnjë deputet nga radhët e Listës Srpska.

“Nuk ka gjykatë që mund t’i thotë një partie politike patjetër duhet të votosh për atë person, nuk mundet. Edhe kur ka qenë rasti im, ne kemi ftuar deputetët e opozitës të votojnë për, kundër apo abstenim. Nuk kemi thënë që e kanë detyrim patjetër të votojnë për, mirëpo ata e refuzuan. Por, për sa kohe ne na refuzonin e votonin kundër, nuk e pamë asnjë votë kundër për ata të Listës Serbe.”

Haxhiu: Me PDK-në assesi në qeveri

Nënkryetarja e Parlamentit të Kosovës, Albulena Haxhiu, tha se Lëvizja Vetëvendosje është në pritje të Gjykatës Kushtetuese, ndërsa në mbledhjen e Këshillit të Përgjithshëm të LVV u mandatua lideri Albin Kurti për kryeministër.

 “Ne kemi mbajtur mbledhjen e Këshillit të Përgjithshëm. Lëvizja ka votuar për mandatar kryeministrin e tashëm, Albin Kurti, kryetarin e Lëvizjes Vetëvendosje. Kemi pasur në plan të vazhdojmë menjëherë me procedurat për zgjedhjen e qeverisë. Për ne është absurde që Kushtetuesja ka pezulluar punën e 120 deputetëve të Kuvendit të Republikës së Kosovës,” tha Haxhiu ndërsa bëri të ditur se për qeverinë e re janë të gatshëm të vazhdojnë negociatat e takimet me Nismën e Fatmir Limaj, apo edhe me ndonjë deputet të interesuar për bashkëqeverisje, por assesi nuk e shohin PDK-në si partner.

“ Sigurisht që ne kemi bërë të hapur se kë e kemi parë si partner, PDK-në assesi, me LDK-në kemi pasur përpjekje, por jemi refuzuar. Negociatat diskutimet e takimet mund të vazhdojnë me Nismën apo ndonjë deputet tjetër që është i interesuar të jetë pjesë e qeverisë së re, apo të jetë në bashkëqeverisje në qeverinë ‘Kurti 3’.

Ne kemi thënë që duhet të ecim përpara, jo të ndalemi, ose me qeveri të re ose me zgjedhje të reja. Kur jemi të zgjedhjet, natyrisht që ky nuk ka qenë synim i yni kurrë, sepse qytetarët e Kosovës kanë vlerësuar me 9 shkurt që LVV-ja është subjekti më i madh me mbështetjen më të madhe e kryeministri Kurti është  personi më i votuar ndonjëherë, dhe në këtë drejtim ne kemi që të interesuar ta bëjmë qeverinë,” tha Nënkryetarja e Parlamentit të Kosovës, Albulena Haxhiu, duke mos përjashtuar opsionin e zgjedhjeve:

“Duket që opozita nuk po e pranon rezultatin e 9 shkurtit, por për këtë ka folur populli, por zgjedhjet, nëse nuk ka interes apo vullnet për ta bërë qeverinë, për të qenë në qeverisje me Vetëvendosjen , janë të mundshme.”