Reshjet e shiut, përmbytet Durrësi, Lezha dhe Vlora

Reshjet e dendura të shiut kanë shkaktuar probleme të shumta në qytetet e Durrësit, Lezhës dhe Vlorës.

Veliera e Gjushit, kjo krenari e rilindasve të Edi Ramës u zgjua ë përmbytur ashtu si në çdo rast kur bie shie për vetëm një orë në Durrës, qendra e qytetit ndërsa më problematike paraqitet situata në lagjen Nr. 17, pranë stadiumit, si dhe në zonën e Shkozetit, lagje këto që tradicionalisht përmbyten pas reshjeve intensive.

Përmbytje janë raportuar edhe në rrugë të tjera të qytetit, ku qarkullimi i mjeteve është bërë i vështirë për shkak të grumbullimit të ujit ndërsa banorët janë në mëshirën e fatit.

Përmbytjes dhe shirave të dendur nuk i ka shpëtuar as tregu industrial, i cili është në pushtetin e ujit, duke bërë që bizneset të mos i ngrenë qepenat për tregti këtë të enjte, ndërsa institucionet edhe pse kanë qenë në dijeni të reshjeve të dendura të shiut dhe përmbytjeve, deri më tani nuk kanë marrë asnjë masë për t’u ardhur në ndihmë.

Përmbytje në Lezhë

Reshjet e dendura të shiut që nisën pas mesnate kanë shkaktuar përmbytje serioze në qytetin e Lezhës, ku më e prekur mbetet lagjja Besëlidhja.

Sipas banorëve, uji ka përmbytur parkingjet dhe rrugicat e lagjes, duke e bërë të pamundur daljen nga pallatet dhe lëvizjen me automjete.

Pamjet nga terreni tregojnë makina të mbytura në ujë dhe hyrje pallatesh të rrethuara nga niveli i lartë i ujit.

Banorët thonë se kjo nuk është hera e parë që lagjja përballet me përmbytje të tilla. Besëlidhja është ndër zonat më problematike në qytetin e Lezhës sikur reshje shiu të ketë vetëm një orë.

Në Vlorë…

Reshjet e dendura të shiut që kanë përshirë qytetin e Vlorës në orët e para të mëngjesit të sotëm, rreth orës 05:25. ka bërë që disa rrugë dhe lagje të përmbyten.

Si zakonisht, më të prekura kanë qenë lagjja “Pavarësia 3”, zona e Skelës,Bulevardi Kryesor I.Qemali , rruga pranë Bibliotekës se qytetit .

Gjithashtu nën ujë janë edhe disa lagje të tjera, si “28 Nëntori”, “Pavarësia” dhe “Kushtrimi”.

Ujërat e mbledhura në rrugë vijojnë të jenë të pranishme, ndërkohë që punonjësit e bashkisë janë në terren për hapjen e pusetave.

Ndryshe, sot Instituti i Gjeoshkencave parashikon që shtrëngatat dhe intensiteti i lartë i reshjeve, mund të krijojnë probleme të ndryshme, si dhe vërshime të ujit në zonat urbane, në varësi të sistemit të kanalizimeve në qarqet Shkodër, Kukës, Dibër, Lezhë, Durrës, Tiranë dhe Elbasan.