Kosova përkujton viktimat e sulmeve terroriste të 11 shtatorit 2001

Krerët e shtetit të Kosovës, me homazhe në përkujtim të viktimave, shënuan 24-vjetorin e sulmeve terroriste të 11 Shtatorit 2001, që morën rreth 3 mijë jetë njerëzish dhe ndryshoi përgjithmonë historinë e Shteteve të Bashkuara.

Pas homazheve të Presidentes Vjosa Osmani, Kryetarit të Parlamentit Dimal Basha dhe Kryeministrit në detyrë Albin Kurti te pllaka përkujtimore në oborrin e Parlamentitit, ku u kujtuan viktimat e ngjarjes së tmerrshme që 24 vjet më parë tronditi mbarë botën, Presidentja Osmani tha se Kosova me krenari qëndron krah Shteteve të Bashkuara.

“Jo vetëm në kujtim dhe nderim të viktimave, por për ta luftuar në mënyrë efektive terrorizmin kudo që ndodh ai. Jemi krenarë që jemi partnerë të palëkundur të Shteteve të Bashkuara të Amerikës, shtet që dha kontribut të jashtëzakonshëm për lirinë tonë,” tha Presidentja e Kosovës, Vjosa Osmani ndërsa Kryeministri në detyrë, Albin Kurti shtoi:

“Homazhet e sotme, përveçse nderim për mbi 3 mijë viktimat e asaj dite tragjike, janë shprehje e mirënjohjes dhe solidaritetit të popullit të Kosovës me SHBA-në.”

Ndryshe, sulmi terrorist i 11 shtatorit përveç se u cilësua si një nga ngjarjet më tragjike të historisë moderne amerikane dhe e ndryshoi atë, ndryshoi gjithashtu politikën e jashtme amerikane, praktikat e sigurisë së brendshme dhe mendësinë e shumë amerikanëve që nuk ishin ndjerë më parë të pasigurt ndaj sulmeve nga ekstremistë të huaj. Efektet u përhapën në mbarë botën dhe brez pas brezi, ndërsa SHBA u përgjigj duke udhëhequr luftën globale kundër terrorizmit.