Festuan vrasjen e Charlie Kirk, kompanitë ajrore i pezullojnë punëtorët nga puna
Kompanitë kryesore ajrore amerikane Delta Air Lines, American Airlines dhe United Airlines kanë konfirmuar se kanë pezulluar disa nga punonjësit e tyre për shkak të postimeve të papërshtatshme në mediat sociale në lidhje me vrasjen e aktivistit konservator Charlie Kirk javën e kaluar, shkruan CNN.
Reagimi i Deltës
CEO i Deltës, Ed Bastian, shpjegoi përmes një shkrese të brendshme se ata mësuan për postimet e punonjësve që “tejkaluan shumë kufijtë e një diskutimi të shëndetshëm dhe të mirë” ndërsa shtoi:
“Këto postime në mediat sociale janë në kontrast të fortë me vlerat tona dhe politikën tonë në mediat sociale, dhe këta punonjës janë pezulluar në pritje të një hetimi”.
American dhe United po ndjekin shembullin
American Airlines tha në një deklaratë se punonjësit që postuan përmbajtje “që promovonin dhunë të tillë në mediat sociale janë pushuar menjëherë nga puna”.
United Airlines veproi në mënyrë të ngjashme, duke konfirmuar pezullimet dhe duke theksuar në një deklaratë:
“Ne u kemi thënë qartë klientëve dhe punonjësve tanë se ka zero tolerancë për dhunën e motivuar politikisht ose çdo përpjekje për ta justifikuar atë”.
“Festuan vrasjen”
Këto Vendime, raportojnë mediat, vijnë pas presionit nga administrata Trump për të sanksionuar këdo që “kapet duke festuar vrasjen”.
Sekretari amerikan i Transportit, Sean Duffy, të shtunën përmes rrjetit social shprehet:
“Kjo sjellje është e neveritshme dhe ata duhet të shkarkohen nga puna. Çdo kompani përgjegjëse për sigurinë e pasagjerëve nuk mund ta tolerojë këtë sjellje.”
Ndryshe, Shefi dhe bashkëthemelues i organizatës rinore konservatore, Turning Point USA, Charlie Kirk, u vra me armë zjarri mbrëmjen e së mërkurës së 10 Shtatorit, gjatë një tubimi në një kolegj në Utah.
Charlie Kirk njihej për podkastet e tij, ishte luftëtar kulture dhe aleat i presidentit amerikan, Donald Trump.
