Thaçi nuk kishte autoritet, Rubin: Komandantët e UÇK-së i thoshin se çfarë përgjigje të jepte!

Hashim Thaçi nuk ka pasur autoritet dhe as mundësi për të diktuar ndonjë gjë, ka deklaruar në dëshminë e tij James Rubin, i cili gjatë kohës së luftës në Kosovë ka qenë Nd/Sekretar amerikan i Shtetit, duke saktësuar se Komandantët e UÇK-së i thoshin atij se çfarë përgjigjeje të jepte, dhe se roli i Thaçit ishte më shumë politik dhe ndërmjetësues.

Rubin: Shqiptarët vriteshin thjesht që ishin shqiptarë të Kosovës

Ish-diplomati amerikan James Rubin, në dëshminë para trupit gjykues në Dhomat e Specializuara të Kosovës në Hagë, tha se shqiptarët vriteshin thjesht që ishin shqiptarë të Kosovës, dhe kjo filloi të ngjasonte me krizën në Bosnjë ku u vranë e masakruan njerëz thjesht për shkak të etnisë së tyre dhe jo për diçka se kishin bërë.

“Shqiptarët vriteshin thjesht që ishin shqiptarë të Kosovës, dhe kjo filloi të ngjasonte me krizën në Bosnjë ku u vranë e masakruan njerëz thjesht për shkak të etnisë së tyre dhe jo për diçka se kishin bërë. Dhe filluam të shihnim se po shfaqej e njëjta politikë, e njëjta gjë dhe kjo na bërë që ne të vepronim, ata ishin viktima, jo vetëm që ishin të shtypur me dhjetëra vite prapë po masakroheshin nga forcat paraushtarake dhe ushtarake serbe dhe ne nuk donim që të përsëritej tmerri i Bosnjes në Kosovë.

Ky ishte qëllimi i politikes sonë,” tha Rubin duke shtuar se bota, SHBA-të vendosën të angazhoheshin në nivel serioz, te angazhonin forcat ushtarake, NATO-n, madje bashkëpunuam edhe me rusët aso kohe të përpiqeshim ta parandalonim një gjenocid tjetër.

Rubin tha se nuk e shihte Hashim Thaçin si faktor kryesor në Konferencën e Rambujesë, por si një përfaqësues të qëndrimeve të delegacionit shqiptar, dhe, sipas tij, Thaçi nuk ishte në gjendje të merrte vendime pa u konsultuar me të tjerët.

“Ai ishte një person të cilit i ishte caktuar detyra të komunikonte me ne nga udhëheqja kosovare, ashtu siç ishte ajo në atë kohë. Ne nuk e kishim kuptuar mirë se si funksiononte struktura udhëheqëse, por e kishim të qartë se ai nuk kishte autoritet dhe as mundësi për të diktuar ndonjë gjë.

Thjesht pasqyronte vendimet që merreshin nga ajo zyra, diku e fshehur, zyra e udhëheqjes shqiptare që merrte vendime në grup dhe që nuk ishin gjithmonë të pranishëm. Kështu që atij i duhej të merrte leje nga ata. Ai nuk kishte mundësi vetë. Nuk ishte në gjendje të diktonte rregulla apo kushte. Prandaj, kur donim të bënim diçka shumë të rëndësishme, ai duhej të komunikonte me persona të tjerë për të marrë miratimin,” tha Rubin.

Rubin: Thaçi nuk kishte autoritet e as mundësi të diktonte asgjë

Ish-Diplomati amerikan deklaroi para Gjykatës Speciale se, për të arritur një marrëveshje paqeje, ishte e domosdoshme të arrihej pajtimi edhe me faktorin ushtarak, andaj Thaçi kryesonte delegacionin në Rambuje.

“Ishte i shqetësuar dhe tha se ishte nën presionin e komandantëve të UÇK-së në Kosovë dhe të financuesve të saj nga Evropa. Ata do ta konsideronin tradhtar. Ai ndjente se, po ta humbiste mbështetjen e Albright-it si mike, kjo do të ishte një katastrofë e vërtetë për kauzën e tij,” tha Rubin duke shtuar se pas një takimi që kishte pasur me sekretaren amerikane Madeleine Albright, James Rubin tha se kishte bërë një shëtitje me Hashim Thaçin, gjatë së cilës ky i fundit i kishte shprehur shqetësimin dhe presionin që ndiente nga komandantët e Ushtrisë Çlirimtare të Kosovës.

Gjatë asaj shëtitjeje, kishte rrëfyer Ruibn, moti ishte i ftohtë dhe Thaçi kishte refuzuar të vishte pallton që ai i kishte ofruar. Për këtë ngjarje u pyet edhe në gjykatë dhe Rubin e pohoi se ishte e vërtetë.

Ai shtoi se Rusia dhe disa vende të tjera kërkonin që në dokumente të mos përmendej fjala “pavarësi”, por vetëm të ndalej lufta. Ndërsa, Thaçi kishte deklaruar se nuk mund të nënshkruante asnjë dokument që nuk përmbante fjalën “pavarësi”, sepse kjo do të shihej si tërheqje nga synimi për pavarësinë e vendit.

Rubin: Nuk i njihnim mirë strukturat e UÇK-së

 Ish-Diplomati amerikan James Rubin, po dëshmon para trupit gjykues në Dhomat e Specializuara të Kosovës në Hagë, në rastin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit. Dëshmia e tij pritet të zgjasë disa ditë.

Rubin u ndal gjatë në përvojën e tij me Hashim Thaçin, për të cilin tha se kishte qenë një moment kyç kur u kuptua se ishte lider i delegacionit shqiptar dhe pjesë e UÇK-së.

“Nuk njihnim mirë strukturat e UÇK-së. Kur arritëm aty e kuptuam që udhëheqësi i delegacionit shqiptar ishte i inkuadruar në UÇK. Folëm për takimin me Thaçin në Rambuje. në kuadër të takimit ai më njohu menjëherë për shkak të TV. Albright më tha që të rrija me të, ta njihja Thaçin më mirë. Gjatë gjithë javës unë kam ndejtur me të, jena takuar, kemi pi kafe, çaj e cigare. Thaçi nuk fliste anglisht në këto rrethana ne komunikonim përmes gjuhës se trupit. Në nivel diplomatik ka pasur përkthyes”, tha ai.

Rubin jep detaje mbi takimet me Thaçin

Duke folur për takimet me Thaçin, James Rubin kujton kohën kur Thaçi shkoi si Kryeministër në New York.

“Pas vitit 2000 kam pasur ndërveprim me Thaçin. Nuk më kujtohen të gjitha, më kujtohet takimi i parë ai ishte djal i ri, e kam takuar në një kohë të vështirë, nuk kishte funksion apo pushtet. Dhe herën e parë jemi takuar pas publikimit të kësaj në New York kur është bërë kryeministër. Erdhi në një restorant si kryeministër, dhe unë u habita nga kjo sepse kishte kaluar nga një djal i ri që punonte në rrethana të vështira, befasisht ishte bërë kryeministër. Kishin kaluar disa vite, 4-5 vite. Kjo ka ndodhur në një restorant në New York.

Hera e fundit besoj duhet të ketë qenë rreth vitit 2018 kur po punoja në Washington dhe ai ishte President i Kosovës. Kontratë me qëllimin për të bërë paqe me Serbinë në përpjekje për t’i dhënë fund konfliktit dhe për të sjellur paqe, isha i gëzuar ta shoh atë, ndoshta ne mund të jepnim fund konfliktit me njohje të ndërsjellë,” tha James Rubin.

Ndryshe, sot mbrojtja ka nisur paraqitjen e provave në gjykimin e Thaçit dhe të tjerët me dëshmitarin e parë James Rubin i cili ka shërbyer si Nd/Sekretar i Shtetit i SHBA-së për Çështjet Publike dhe Zëdhënës Kryesor nga viti 1997 deri në vitin 2000.

Në prezantimin e tij që i bëri James Rubinit, avokati kryesor i Ish-Presidentit Hashim Thaçi, Luka Mishetiç, tha se dëshmitari ishte I Dërguar i lartë i Sekretares së Shtetit Madeline Albright dhe u përfshi në Rambuje me përfaqësuesit shqiptarë të Kosovës dhe në demobilizimin e UÇK-së. Avokati Mishetiç tha se dëshmitari, Rubin, ka treguar paraprakisht në dëshminë e tij para mbrojtjes se në Rambuje, Thaçi i ka treguar se ishte i shqetësuar se nuk kishte autorizimet e nevojshme për të dhënë nënshkrimin e tij në emër të Ushtrisë Çlirimtare të Kosovës.

Gjatë kohës kur James Rubin dha dëshminë, Përfaqësues të Qeverisë së Shteteve të Bashkuara ishin të pranishëm në sallën e gjyqit për të shoqëruar dëshminë.