Parada e Ushtrisë së Vuçiçit në Beograd, me avion Rafale nga Parisi
Presidenti i Serbisë, Aleksandar Vuçiç, premtoi një paradë të madhe në Beograd, por, ajo që u pa sot dhe ishte pagëzuar “Forca Unitetit”, tregoi me përfundimin e saj se Vuçiçit i mbeti për t’u mburrur me mysafirët e vetëm ndërkombëtar, presidentin e Emirateve të Bashkuara Arabe Mohammed bin Zayed, anëtarin e familjes mbretërore të Bahreinit Nasser bin Hamad dhe aktorin Steven Seagal, nga armatimi më modern avionin Rafale që i kishte dhënë borxh Emmanuel Macron sa për paradë ushtarake, dhe dhunën që ushtroi ndaj studentëve protestues në këtë ditë festive deri në momentin sa u mbyll gjithë ky promovim i kërcënimit për Ballkanin Perëndimor, me kërcimin e parashutistëve serbë nga 1.500-2.000 metra.
Komentar je suvišan. pic.twitter.com/GCwOEc3D56
— Rodoljub Sabic (@RodoljubSabic) September 20, 2025
Gjithësesi, kërcënimi për Ballkanin që kishte përgatitur Aleksandar Vuçiç me paradën ushtarake spektakolare “Forca e Unitetit” në Ditën e Unitetit, Lirisë dhe Flamurit Kombëtar Serb, ku morën pjesë 10.000 anëtarë të Ministrisë së Mbrojtjes me rreth 2.500 armë dhe pajisje ushtarake, më shumë se 600 automjete, 70 avionë dhe 20 anije, kërkonte edhe publik që do ta mbështeste, por, ndonëse parada po mbahej përpara Pallatit “Serbia” në Beograd dhe qytetarët e kryeqytetit serb i kishte kundër, pushteti i tij kriminal u kujdes që na qytetet tjera të sajoj këtë mbështetje duke i sjellë militantët me autobusë!
Në Savë, anijet e Flotiljes së Lumit
Pas marshimit të njësiteve ushtarake që përfunduan me gardën e nderit, u shfaqën anëtarët e Brigadës së 72-të të Operacioneve Speciale dhe njësisë Kobra, pasuar nga anëtarët e Flotiljes së Lumit dhe Brigadës së 250-të të Raketave. Rojet kryen një stërvitje tradicionale, e ndjekur nga duartrokitjet e turmës.
Ndërsa anijet e Flotiljes së Lumit po lundronin në lumin Sava, dhe disa prej tyre mbanin dronë të rinj, Kobrat demonstruan neutralizimin e sulmuesve.
Në parakalimin e automjeteve të blinduara u panë me radhë Humvee, automjetet Miloš, BRDM, kuadrot, Lazar, BTR të modernizuara dhe MRAP. Njësitë e policisë ushtarake ishin në automjete BOV dhe Bearcat.
Kjo u pasua nga një shfaqje e radarëve dhe sistemeve kundërajrore. U shfaq Giraffe i modernizuar për zbulimin e objektivave që fluturojnë ulët, sistemi FK-3, Pantsir dhe HQ-17, sistemi serb Pasars, i ndjekur nga Krasuha për bllokimin elektronik, si dhe sisteme të reja serbe për bllokimin dhe shkatërrimin e dronëve si Kobac 1.
Parada përfundoi me kërcimin e parashutistëve
Në këtë paradë për të cilën foli aq shumë Vuçiç se do trazonte shumë ujëra, parakaluan edhe robotët “Mali Miloš” /Lexo shqip: Milloshi Vogël/, gjithashtu midis atyre që u quajtën risi ishte dhe droni i madh Hermes 900, i ndjekur nga dronët CH-95 dhe mjetet ajrore pa pilot të prodhimit serb, përfshirë dhe atë Komarac /Lexo shqip: Mushkonja/. U shfaq sistemi raketor Puls, për të cilin u tha se ka rreze veprimi deri në 300 kilometra, i ndjekur nga sistemet Nora, KUB dhe mjetet luftarake të këmbësorisë të modernizuara, si dhe tanket T-72 dhe M-84.
U prezantuan gjithashtu sisteme në zhvillim, duke përfshirë Tamnav dhe Šumadija, të cilat u prezantuan se mund të mbajnë raketa balistike Jerina dhe raketa lundrimi Vila. U shfaq edhe një version i ri i obusit Nora M-25 me mbushës automatik dhe sistemi hibrid PZO Harpas.
Në pjesën ajrore të paradës, performuan një skuadrilje MiG 29, Shqiponja të modernizuar, aeroplanë transporti CASA, aeroplanë stërvitorë dhe helikopterë H-145M, Mi-35 dhe Mi-17. Vëmendje e veçantë tërhoqi avioni luftarak francez Rafale, i cili fluturoi direkt nga Franca për qëllime të paradës.
Finalja e madhe e paradës u shënua nga kërcimi i parashutistëve nga helikopteri H-145 nga një lartësi prej 1.500-2.000 metra ku një parashutist mbante flamurin e Republikës së Serbisë, dhe tjetri flamurin e Ushtrisë Serbe.
Më të gëzuarit me përfundimin e paradës, përkundër aktrimit të Presidentit të Serbisë, Aleksandar Vuçiç, ishin studentët dhe qytetarët protestues të cilët ishin bllokuar nga njësitë speciale të mos lëvizin deri në mbyllje, dhe kthimin e lirisë së tyre për të lëvizur, ata filluan duke kërcuar dhe brohoritur: Kush nuk kërcen është budalla!
