S’ka shërbim shëndetësor cilësor me hajdutë në krye!

nga Bardh Spahia*

Në 12 vite pushtet absolut, me taksat më të larta në rajon, Edi Rama ka pasur në dorë miliarda euro për ta përmirësuar shëndetësinë, por dështoi ta bëjë.

Sa cinik, arrogant dhe i pandjeshëm duhet të jesh që t’u tregosh pacientëve inteligjencën artificiale në shëndetësi, kur shëndetësisë i lë më pak se 2% të GDP-së? Kur në fund të muajit urdhëron të mos bëhen analiza, se koncesioni kalon kufirin buxhetor?

Sa cinik, arrogant dhe i pandjeshëm duhet të jesh kur flet për inteligjencë artificiale në shëndetësi, por në fund të muajit urdhëron shtyrjen e operacioneve, sepse koncesioni i sterilizimit ka ezauruar fondin?

Sa cinik, arrogant dhe i pandjeshëm duhet të jesh, kur flet për inteligjencë artificiale në shëndetësi, kur e gjithë QSUT është vetëm me 1 aparat rezonance dhe ai s’funksionon çdo ditë, apo teksa sheh çdo ditë se si i dorëzohen fatit të tyre të keq pacientët onkologjik nga mungesa e medikamenteve dhe aparaturave trajtuese?

Në Itali psh. ashtu si shumë shqiptarë besoj, nuk kam parë inteligjencë artificiale por shërbim njerëzor dhe cilësor, madje falas. Prandaj është e qartë që “shashka” e IA i shërben vetëm propagandës së Ramës dhe aspak njerëzve.

Në vend që të kishim medikamente, aparatura moderne dhe shërbim të plotë e të pandërprerë shëndetësor, kemi reklama boshe për inteligjencë artificiale nga një kryeministër që ka larguar nga vendi më shumë se 25% e mjekëve dhe infermierëve. Pse ndodh kjo? Sepse miliardat e taksave nuk janë përdorur për shëndetësinë, për qytetarët, por janë shpërdoruar në koncesione korruptive në shëndetësi për financuesit dhe klientët e Edi Ramës, ndërsa shqiptarët vazhdojnë e paguajnë rreth 60% nga xhepi për shërbimet (sipas Bankës Botërore).

Ky është thelbi: një qeveri që vjedh, nuk mund të ndërtojë kurrë një shëndetësi që u shërben njerëzve. Sepse aty ku sundon korrupsioni, edhe inteligjenca artificiale kthehet në fasadë dhe mburojë për dështimin real.

*Deputet i PD