Ndër 25 kompanitë më të mëdha në botë, nuk ka asnjë kompani evropiane!

Raporti i PwC, njërën nga kompanitë më të mëdha të auditimit dhe konsulencës në botë, mbi kompanitë më të mëdha në botë sipas kapitalizimit të tregut, tregon një ndryshim dramatik në shpërndarjen globale të pushtetit. Për herë të parë në histori, nuk ka kompani evropiane ndër 25 kompanitë më të mëdha në botë.

Dominimi i gjigantëve amerikanë të teknologjisë është bërë absolut, ndërsa kompanitë evropiane janë zhytur në pozicione që ishin të paimagjinueshme edhe një dekadë më parë.

Ndërsa Shtetet e Bashkuara dhe Kina po investojnë me shpejtësi në inteligjencën artificiale, çipat dhe platformat dixhitale, ekonomia evropiane mbetet e rënduar nga burokracia e ngadaltë dhe investimet e ulëta. Nëse trendi nuk përmbyset, fuqia e vjetër industriale mund të shndërrohet në një vëzhgues teknologjik të rënies së saj ekonomike.

Gjigandët amerikanë çimentojnë dominimin

Pothuajse çdo pozicion në 20 vendet e para mbahet nga kompanitë amerikane.

Apple ka rimarrë vendin e parë me një kapitalizim tregu prej 3.34 trilion dollarësh, para Microsoftit me 2.79 trilion dollarë dhe Nvidia 2.64 trilion dollarë. Amazon, Alphabet, Meta dhe Berkshire Hathaway, të gjitha nga SHBA, vijojnë, ndërsa i vetmi anëtar joamerikan i dhjetë vendeve të para mbetet Saudi Aramco në vendin e gjashtë.

Kompanitë amerikane përbëjnë 73 për qind të vlerës totale të 100 kompanive më të mëdha në botë, ose më shumë se 31 trilion dollarë.

Kina dhe Hong Kongu së bashku zënë 11 vende me një rritje të kombinuar prej 51 për qind, ndërsa Evropa përjetoi një rënie në vlerë prej 13.6 për qind dhe humbi dy kompani të tjera nga lista.