Fertilizimi invitro në shtet, 162 gra të trajtuara në gati dy vite, 3 lindje të arritura

Rritet numri i grave që po i nënshtrohen trajtimit të fertilitetit invitro në institucionet shëndetësore publike.

Prej gati dy vitesh ofrim të shërbimit falas pranë Qendrës së Riprodhimit Mjekësor të Asistuar, Q.R.M.A, strukturë brenda materniteti shtetëror “Koço Glozheni” janë trajtuar 162 paciente. Kostoja totale për trajtimin e pacienteve llogaritet rreth 124 mijë euro. Arrin në tre numri i bebeve të lindura nga fertilizimi invitro.

Në vitin e parë të ofrimit të shërbimit falas nga shteti, sipas të dhënave të raporteve të monitorimit financiar për Ministrinë e Shëndetësisë janë trajtuar për fertilizimin invitro 30 pacientë me një kosto prej 326.971 lekë/pacientë. Për 2024 kostoja totale e shpenzimeve llogaritet në vlerën e 9.809.130 lekëve.

Për 4-mujorin e parë 2025 janë trajtuar 45 pacientë me një kosto prej 9.588.8 lekë/pacientë. Për janar -prill kostoja totale e shpenzimeve për procesin e fertilizimit invitro llogaritet 431.460 lekë.

Për periudhën janar-gusht 2025 rezulton se janë trajtuar edhe 87 pacientë me një kosto prej 18.436 lekë/pacientë. Totali i kostos llogaritet 1.603.932 lekë.

Për gati 2 vjet nga nisja e ofrimit të procesit falas nga 162 pacientet e trajtuara në 108 prej tyre është realizuar “trasferta” (“transferta” i referohet transferimit të embrioneve në mitrën e gruas pas një cikli fertilizimi in vitro). Ndërsa procedura ka rezultuar e pasuksesshme për 21 paciente apo rreth 13 për qind e tyre.

Për 2024 nga 20 “transfertat” e realizuara, 9 prej tyre kanë pasur rezultate pozitive ndërkohë që 11 prej tyre kanë pasur rezultate negative.

Për janar-prill 2025 nga 28 “transfertat” e realizuara 26 prej tyre kanë realizuar procedurën e “pick up” (është procedura e nxjerrjes së vezëve për t’u përdorur për fertilizim) ndërkohë që 2 prej tyre kanë pasur stimulim të pasuksesshëm. Përqindja e suksesit deri më sot ka qënë 55 për qind.

Për janar-gusht 2025, sipas të dhënave të Ministrisë së Shëndetësisë nga 60 transfertat e realizuara, 52 prej tyre kanë realizuar procedurën pick up, ndërkohë që 8 prej tyre kanë patur stimulim të pasuksesshëm. Përqindja e suksesit ka qenë 46 për qind.

Në total për vitin 2025 Ministria e Shëndetësisë parashikon që përmes paketës falas të fertelitetit të përfitojnë 150 çifte./Monitor/