Holandë, Vasfije Krasniqi flet për viktimat e dhunës seksuale

Vasfije Krasniqi Goodman, një ndër zërat më të fuqishëm në betejën për drejtësi për viktimat e dhunës seksuale gjatë luftës në Kosovë, me ftesë të Ministrisë së Punëve të Jashtme të Holandës do të jetë në Hagë, për “Women, Peace and Security(WPS)”, ku do të flasë para 250 pjesëmarrësve nga 25 shtete të ndryshme.

“Do të flas për dhembjen që nuk plaket, për heshtjen që na është imponuar me vite, për një të vërtetë që bota shpesh ka zgjedhur ta anashkalojë.  Por nuk jam vetëm. Mbrapa meje qëndrojnë mijëra gra që nuk patën rastin të dëshmojnë. Qëndron Kosova, që ende pret drejtësi për krimet e kryera ndaj nesh,” ka bërë të ditur vetë Vasfije Krasniqi Goodman përmes rrjeteve sociale.

“Kërkoj që dhuna seksuale të trajtohet si krim lufte, siç është. Kërkoj që askush më të mos jetojë me turpin që nuk i takon,” tha Vasfije Krasniqi Goodman duke u shprehur qartë se nuk kërkon mëshirë, por drejtësi.

“Ky zë është plagë, por edhe forcë. Dhe sa herë që flas, e di se një padrejtësi po dridhet.  Paqja nuk ndërtohet mbi heshtje. Pa drejtësi, nuk ka paqe. Për të gjitha ato që nuk patën mundësi të flasin – unë do të flas”, u shpreh në fund Vasfije Krasniq-Goodman.