Vrasje e dyfishtë në Malishevë, viktimat vëllezër

Dy vëllezër janë vrarë sot në fshatin Golluboc të Malishevës. Lajmin e ka konfirmuar zëdhënësi i Policisë për rajonin e Gjakovës, Sheremet Elezaj, i cili ka bërë të ditur se personeli mjekësor në QMF ka konstatuar vdekjen.

“Rreth orës 11:30, jemi njoftuar se dy persona të gjinisë mashkullore, të moshës madhore (vllezër), janë dërguar në QMF-në e Kijevës si pasojë e plagëve të marra nga arma e zjarrit në fshatin Golluboc të Malishevës. Personeli mjekësor në QMF ka konstatuar vdekjen e viktimave. Njësitë e nevojshme policore i janë përgjigjur menjëherë rastit dhe kanë dalë në vendin e ngjarjes,” tha Sheremet Elezaj.

Duke bërë me dije se deri më tani është identifikuar një person i dyshuar, zëdhënësi i Policisë për rajonin e Gjakovës, Sheremet Elezaj, përfundon:

“Në koordinim me prokurorin e shtetit, janë duke u ndërmarrë të gjitha veprimet e nevojshme hetimore lidhur me rastin dhe arrestimin e të dyshuarit.”

Mësohet se i dyshuar për vrasjen është Astrit Isufi, bashkëshorti i motrës së viktimave, Driton Morina dhe Naim Morina.