Trump i kërkon Presidentit të Izraelit amnisti për Kryeministrin Netanyahu

Presidenti i Izraelit, Isaac Herzog, ka marrë një letër nga Presidenti i SHBA-së, Donald Trump, ku thekson të marrë në konsideratë idenë e amnistisë për Kryeministrin Benjamin Netanyahu, ka bërë të ditur sot zyra e tij.

Ka pasur tre gjyqe të ndara për korrupsion kundër Netanyahut për disa vite dhe Trump ka kërkuar vazhdimisht aministinë e tij.

“Ndërsa unë respektoj absolutisht pavarësinë e sistemit gjyqësor izraelit dhe kërkesat e tij, besoj se ky ‘rast’ kundër Bibit, i cili ka luftuar prej kohësh përkrah meje, ndër të tjera, kundër armikut shumë të fuqishëm të Izraelit, Iranit, është persekutim politik dhe i pajustifikuar,” thekson Presidenti Trump në letrën drejtuar presidentit izraelit.

Zyra e Herzog tha se kushdo që kërkon një aministi presidenciale duhet ta kërkojë zyrtarisht atë, sipas procedurave ekzistuese, raporton Agjencia e lajmeve Reuters. Presidenti Trump gjithashtu bëri thirrje për faljen e Netanyahut gjatë vizitës së tij në Izrael në tetor, në një fjalim para parlamentit izraelit.

Opozita: Kjo është tipike për Trumpin
Lideri i opozitës izraelite, Yair Lapid, iu përgjigj thirrjes së Presidentit Trump me një “kujtesë” se ligji izraelit përcakton që kushti i parë për falje është “pranimi i fajit dhe shprehja e pendimit”.

Më herët, Lapid, “me gjithë respektin e duhur për Trumpin”, theksoi se “askush nuk duhet të ndërhyjë në procesin ligjor të një shteti të pavarur” dhe e quajti iniciativën e presidentit amerikan “kompensim” për Netanyahun, për presionin që i bëri për të ndaluar luftën në Gaza.

“Ky është Trump tipik”, u shprehë Yair Lapid në atë kohë.