Në mbrojtje të Thaçit, çfarë tha Christopher Hill gjatë dëshmisë së tij në Hagë

Gjatë dëshmisë treditore në mbrojtje të ish-presidentit të Kosovës, Hashim Thaçi, i akuzuar për krime lufte dhe krime kundër njerëzimit, diplomati amerikan në pension, Christopher Hill, foli për rolin e Thaçit në Ushtrinë Çlirimtare të Kosovës dhe në negociatat në Rambuje.

Christopher Hill tha për Hashim Thaçin se kishte përshtypjen se ai ishte një njeri i besueshëm si bashkëbisedues, por nuk ishte vendimmarrës.

“Nuk i ishte lënë në dorë vendimmarrja. Ky është versioni im,” tha Hill ndërsa rikonfirmoi se nuk e di nëse Thaçi ishte ndonjëri prej themeluesve të UÇK-së.

“Kjo përshtypje bënte kuptim kur ai tha se nuk mund të pajtohej me atë se çfarë ishte bërë në Rambuje edhe që na tha se nëse binim dakord pa u konsultuar, kur të kthehej do ta vrisnin,” tha didplomati amerikan.

Gjyqtari, Guénaël Mettraux, e pyeti  ambasadorin Hill në cilësinë e dëshmitarit të mbrojtjes, nëse e dinte ai se e ku shkuan Thaçi, Krasniqi e Veseli nga Franca nga koha kur mbaroi raundi iu parë i negociatave.

“Nuk e di. Unë e di që ata u morën nga një avion francez, unë kisha menduar se ata do të shkojnë në Shkup, por pastaj kam dëgjuar se u dërguan në Prishtinë me avion, besoj që e kam dëgjuar këtu në Hagë ndoshta dje, ndoshta pardje. Ata kanë shkuar në vende të ndryshme besoj. Megjithatë besoj kam dëgjuar fjalë që Thaçi ka qenë në Tiranë,” tha Hill ndërsa shtoi se ishte përpjekur të merrte informacione nga ambasada  e tyre nëse ata kishin ndonjë shenjë që Thaçi ishte atje, por tha se ishte vështirë edhe për ambasadën që të gjendej ndonjë gjurmë e tij.

“Sado shumë UÇK-ja të ishte përgatitur dhe dëshironte që të ecte përkrah nesh, e para ata nuk ishin një strukturë vertikale e organizuar dhe kjo është një mënyrë shumë elegante për të thënë se sa të organizuar ishin ata”, deklaroi gjatë dëshmisë së tij, Hill.

Hill për komunikatat e UÇK-së: S’e di kush i lëshonte

Për komunikatat që pretendohet se janë lëshuar nga Ushtria Çlirimtare të Kosovës, UÇK, diplomati amerikan Hill tha se nuk e di se nga kush janë lëshuar ato dhe për çfarë arsyesh.

“Këto ishin shumë të mjegullta për ne sepse ne nuk e dinim se kush i lëshonte këto komunikata. A ishin çështje sigurie që nxirreshin apo vërtetë nuk ekzistonte një strukturë që të besonim edhe ne. Prandaj, ne nuk mund t’i përdornim këto komunikata si bazë për të përcaktuar një strukturë vertikale organizative të UÇK-së,” tha Christopher Hill në ditën e tretë të dëshmisë në Gjykatën Speciale në Hagë, ndërsa i përgjigjej trupit gjykues duke sqaruar se kishte shumë persona që flisnin në emër të UÇK-së.

“Sipas meje dhe në cilësinë time si i deleguar i posaçëm, unë e kisha të qartë dhe të tjerët ma kishin bërë të qartë se ne nuk e dinim se kush fliste për UÇK-në. Për shembull, zoti Demaçi fliste për rolin që ai kishte në UÇK, por askush nuk ma konfirmoi. Kishte shumë persona që prezantoheshin se flisnin në emër të UÇK-së. Problemi ynë ishte që nuk kishim një pikë kontakti të konfirmuar me të cilën mund të komunikonim për të ardhmen!”

“Adem Demaçi ishte gjithmonë shumë i rreptë dhe strikt për çdo temë”

Duke fol për Adem Demaçin, Christopher Hill gjatë dëshmisë së tij në Hagë, tha se i ndjeri kishte një lloj mllefi pasi kishte qenë i burgosur, dhe dihej dhe njihej si një person me opinione të egra ndaj Serbisë.

“Jo vetëm në Kosovë, por edhe pjesa tjetër e Jugosllavisë e dinte këtë. Nuk ishte person me të cilin mund të bashkëpunoje. Nuk ishte person që mund të punoje me një dokument, kishte opinione të forta lidhur me disa rrethana në jetë, dhe shumë mirë që i kishte ato, por në aspektin e bashkëpunimit, nuk ishim të interesuar ta promovonim,” tha diplomati amerikn.

Shqiptarët e donin Kosovën Republikë si shtetet tjera që ishin shkëputur nga Jugosllavia, tha Christopher Hill.

“Personat shprehnin dhe thonin se unë e mbështes se Kosova do të jetë në Republikë. Pra, si të gjitha republikat tjera të shkëputura nga Jugosllavia. Pra, kur thoshin republikë e krahasonin me shtetet e tjera që ishin shkëputur nga Jugosllavia”, tha ai ndërkohë trupi gjykues dha një urdhër me gojë për pranimin në prova materiale të një interviste me Wolfgang Petritsch që është marrë nga një libër.

Sipas mbrojtjes së Thaçit, ky material nuk duhet të pranohet nga kjo intervistë ngase del një pretendim i ri në thelb dhe pretendimi ose akuza është në kundërshtim me argumentet e ZPS-së dhe veçanërisht është në kundërshtim edhe me një material specifik të Prokurorisë.

Mbrojtja kishte pretenduar se nuk janë njoftuar me kohë dhe sipas tyre, Prokuroria në këtë fazë të procesit nuk duhet të dalë me një argument të ri që është në kundërshtim me argumentet e tyre të mëparshme.

Pse dëshmoi në Gjykatën Speciale në Hagë

Ish-diplomati amerikan Christopher Hill ka sqaruar trupin gjykues edhe pse pse ka vendosur që të dëshmojë si dëshmitar i thirrur nga Hashim Thaçi.

“Koha nuk i shëron të gjitha, siç thuhet të gjitha plagët, por mendoj se pas 25 viteve është kohë e madhe që të mendohet, pikë së pari nuk kam arsye që të besoj se zoti Thaçi ishte i përfshirë në aktivitete të tilla, nuk kam arsye të besoj as nuk kam dëgjuar që të ketë urdhëruar aktivitete të tilla apo veprimtari të tjera të paligjshme. Siç e kuptoj unë, ai është mbajtur i paraburgosur për një kohë të caktuar lidhur me këto çështje. Dhe ndjeva se duhet të thoja diçka për situatën,” tha Hill në përgjigjen për dëshminë e tij ku ka folur për kohën e përfundimit të luftës në Kosovë, largimin e forcave serbe dhe hyrjen e forcave të NATO-s në Kosovë, vizitën e Presidentit Clinton në kampin e refugjatëve kosovarë në Maqedoninë e Veriut, me ç’rast i falënderoi për pritjen e refugjatëve kosovarë.

Ndryshe, pas Christopher Hill, dëshminë e ka vazhduar Mike Durkee, ish-këshilltar politik i katër komandantëve të NATO-s për Evropë (1993-2009) dhe këshilltar i gjeneralit amerikan, Wesley Clark më 1999, i cili udhëhoqi fushatën e Aleancës kundër forcave serbe që u finalizua me çlirimin e Kosovës.