Përfundon numërimi në Mitrovicën e Jugut: 75 fletëvotime me probleme, i takojnë të dy kandidatëve!
Ka përfunduar procesi i numërimit dhe verifikimit të votave në Qendrën Komunale të Numërimit në Mitrovicën e Jugut, ku ka rezultuar se janë 75 fletëvotime me mospërputhje të numrave serik, që i takojnë të dy kandidatëve.
Me përfundimin e procest të verifikimit të fletëvotimeve në orën 14:00, kryesues i Komisionit Komunal Zgjedhor, Bajram Hajdari, sqaroi epilogun e fletëvotimeve me mospërputhje të numrave serik :
“Tash jemi duke bërë përgatitjet për bartjen e materialit në QNR, në Fushë Kosovë. Sipas një verifikimi paraprak, janë 75 fletëvotime për të cilat po flisni ju. Këto fletëvotime i takojnë të dy kandidatëve. Me kërkesë të policisë, i kemi bërë kopje dhe i kemi dorëzuar. Tani janë organet tjera që merren me to,” tha Bajram Hajdari.
Por, ndryshe nga kreu i Komisionit Komunal Zgjedhor, anëtari i Komisionit Qendror të Zgjedhjeve nga radhët e Partisë Demokratike të Kosovës, Ilir Gashi, foli me gjuhën e kryetarit të partisë duke deklaruar se gjatë këtij procesi janë evidentuar parregullsi serioze në fletëvotime.
“Siç e dini, sot përfundoi procesi i verifikimit dhe numërimit të votave në këtë qendër. I falënderoj të gjithë vëzhguesit dhe numëruesit për punën e mirë dhe për identifikimin e çdo fletëvotimi. Megjithatë, gjatë procesit kemi vërejtur defekte serioze në disa prej tyre, që në një mënyrë apo tjetër kanë rrënuar besimin e qytetarëve në procesin zgjedhor,” tha Ilir Gashi duke vlerësuar se mënyra e vetme për ta rikthyer besimin dhe integritetin e procesit është zhvillimi i zgjedhjeve të reja në Komunën e Mitrovicës së Jugut.
“Ne konsiderojmë se e vetmja mënyrë për ta kthyer këtë proces në binarë dhe për t’i dhënë besueshmëri është që qytetarët e Mitrovicës së Jugut të ftohen sërish në votim. Opinioni publik tashmë mendon se ky proces është dëmtuar thellësisht,” shtoi Gashi duke paralajmëruar një kërkesë të PDK-së për analizë hetimore.
“PDK ka dorëzuar ankesë në Panelin Zgjedhor për Ankesa dhe Parashtresa, PZAP, dhe do t’i ndjekë të gjitha rrugët ligjore!”
Por, ndryshe nga kolegu i PDK-së, Sami Kurteshi nga LVV në KQZ tha se nuk ka asnjë informatë rreth numrit të fletëvotimeve me mospërputhje të numrave serik dhe nuk ka çfarë të deklarojë.
Kështu, edhe ky lloj verifikimi të votave për kryetar të komunës Mitrovicë nuk ndryshoi rezultatin e 9 Nëntorit në mes të Faton Pecit të Lëvizjes Vetëvendosje dhe Arian Tahirit të PDK-së, ku fitorja ishte e thellë me një diferencë prej 2.315 votave.
Ndërkohë Kryetari i PDK, Memli Krasniqi, përkundër zellit të madh të anëtarit të Komisionit Qendror të Zgjedhjeve nga radhët e Partisë Demokratike të Kosovës, Ilir Gashi, për vazhduar lutën me batonë e buzhalë, reflektoi dhe mori një vendim të një njeriu normal, dha dorëheqje.
“Sot pas shumë kohe reflektimi, ka ardhur momenti i duhur, prandaj sot kam vendosur të japë dorëheqje nga pozita e kryetarit të partisë,” tha Memli Krasniqi ndërsa bëri të ditur se ka thirrur Konventën e PDK-së për të hënën, më 17 nëntor, ku do të zgjidhet kryetari i ri i partisë.
Ndryshe, bazuar në rezultatin përfundimtar në 38 komuna, PDK, është humbësi më i madh i këtyre zgjedhjeve me gjashtë komuna të fituara: Prizren, Vushtrri, Kaçanik, Skënderaj, Ferizaj dhe Han i Elezit; Por, në vitin 2021 ajo drejtonte edhe 3 komuna të tjera: Mitrovicë e Jugut, Drenas, Dragash!
Ndërsa Lëvizja Vetëvendosje doli fituese duke drejtuar tashmë tre komuna më shumë, ose gjithsej: Mitrovicë e Jugut, Gjilan, Obiliq, Fushë Kosovë, Kamenicë, Podujevë dhe Shtime!
Lidhja Demokratike e Kosovës sërish drejton 7 komuna Prishtinë, Pejë, Dragash, Viti, Junik, Istog dhe Lipjan, por humbi dy bastionet historike, Obiliqin dhe Fushë Kosovën!
Aleanca për Ardhmërinë e Kosovës vetëm sa ruajti 5 komuna që drejtoi: Gjakovë, Suharekë, Klinë, Rahovec dhe Deçan
Në fund, të mos harrojmë se Nisma Socialdemokrate, Partia Turke KDTP dhe iniciativa e Ramiz Lladrovcit siguruan nga një komunë secila, dhe, Lista Srpska ka kontrollin në të dhjetë komunat me shumicë serbe.
