“28 Dhjetori”, Kurti: Dita e zgjedhjeve është festë e demokracisë!

Pas caktimit të datës së zgjedhjeve të jashtëzakonshm parlamentare nga Presidentja e Kosovës, Kryeministri në detyrë dhe Kryetari i Lëvizjes Vetëvendosje, Albin Kurti, e vlerësoi 28 Dhjetorin si datën më të përshtatshme për mbajtjen e procesit zgjedhor.

“Dita e zgjedhjeve është festë e demokracisë. Ajo bëhet edhe më madhështore kur ka pjesëmarrje sa më të madhe të qytetarëve tanë me të drejtë vote. Në të njëjtën kohë, duhet të sigurohemi që institucionet shtetërore kanë kohën e mjaftueshme për të bërë të gjitha përgatitjet e nevojshme që procesi zgjedhor të jetë i rregullt, i drejtë dhe demokratik,” tha Kryeministri në detyrë, Albin Kurti, duke reaguar përmes rrjetit social Facebook pas shpalljes së datës nga Presidentja Osmani ndërsa përfundoi:

“Ne e mirëpresim caktimin e datës 28 dhjetor nga Presidentja e vendit, Vjosa Osmani-Sadriu, si datën më të përshtatshme për zgjedhjet e parakohshme që po na presin.”

Ndryshe, pas takimit me liderët e partive parlamentare, Presidentja e Kosovës, Vjosa Osmani, shpërndau Parlamentin dhe nga propozimet që mori për datën e mundshme të zhvillimit të zgjedhjeve të jashtëzakonshme, dekretoi datën 28 Dhjetor.