Personalitete s’ka! Tallja e vitit: Diella!

Traditën e personalitetit të vitit si çdo gjë në këtë vend e ka bërë të pakuptimtë Edi Rama duke vazhduar të tallet me këtë popull, dhe, nga ana tjetër të gjithë i hapën krahun; Për fat të keq, edhe intelektualët!

Pra, personalitetet e shquara të këtij kombi, në rasin më të mirë heshtën ndërsa ata që u munduan ta bëjnë opozitarin u asfiksuan nga mediat që vazhdojnë të jenë në shërbim të një njeriu të vetëm, Edi Ramës!

Kështu, talljet e Edi Ramës për gjatë gjithë qeverisjes së tij ishin të rënda, por, ky vit elektoral ka shtuar peshën e talljes duke vënë në pikëpyetje edhe nivelin mendor të këtij populli kur dëgjon liderin e tyre se do ta fus Shqipërinë edhe në Bashkimin Evropian, dhe, heshtë!

Mirë, e besoi Trenin Elektrik deri në Aeroportin e Rinasit dhe Portin e Durrësit edhe pse nuk ka drita në shtëpi, duke u lumturuar se nuk do ta ha trafikun të paktën; Ditët kaluan, mileti ngeli në trafik ndërsa Tren nuk pa njeri, madje as lodër për ti dëshmuar ngatërresën e të gjithë atyre që i dhanë votën.

E besoi edhe avionin për shuarjen e zjarreve sepse po i digjen malet çdo vit, e përderisa Kroacia i ka nëntë pse Shqipëria nuk do ta ketë të paktën një; Por, mileti ashtu si edhe Edi Rama harruan se fushata zgjedhore do të marrë fund, vera do të vijë dhe malet do fillojnë të djegen, ndërsa policët e shkretë sërish do të shfaqen me shkurre në dorë duke shuar zjarrin deri sa të vijë Adriatik Lapaj me bidon në dorë dhe avionët e grekut dhe kroatit të mëshirohen ndaj qyrravitjeve të Ramës!

Mileti harroi mashtrimin e Aeroportit të Kukësit dhe i besoi përrallës me Aeroportin e Vlorës, në fund normalisht aeroporti nuk u ndërtua por fabula për ti besuar këtij dështimi ishte gati, u çuan aksionerët peshë, që tallja të jetë më e besueshme, mediat që ka nën kontroll “zbulojnë” se janë kosovarë, dhe mbyllet kapaku i këtij pisllëku me premtimin se një ditë do të bëhet, por, jo këtë vit siç e kishte thënë lartëmadhnia e Pacollit dhe Valonit, Edi Rama!

Me sytë nga qielli shqiptarët ngelën duke pa se kur do të fillojnë reshjet e floririt meqë e kemi Shqpiragun, siç tha Kryeministri i mashtrimit dhe talljes në gjithë Shqipërinë, Edi Rama! Por, kompania Shell, për dallim nga Pacolli dhe Valoni, nuk gënjen për llogari të Edi Ramës dhe testi i saj rezultoi aq shumë zhgënjyes sa filluan ti bëjnë gati valixhet. Ndërsa Fondi Sovran për të cilin foli Kryeministri u rendit tek talljet e radhës me këtë popull që nuk e do të vërtetën!

Me mbylljen e premtimeve elektorale dhe zgjedhjeve të 11 Majit kur asgjë nuk po realizohej, erdhi dhe sezoni turistik pa ujë si zakonisht, por, Zona e Parë Operative është më e arsyeshme kur në pushtet nuk është Saliu, dhe fillojnë e përsërisin premtimin e Edi Ramës në fushatë se do të jetë viti 2030 kur do të kenë ujë 100% të qyteteve dhe 80% e fshatrave për 24 orë. Pse ky premtim ishte ai që e kishte dhënë po ky Edi Ramë në vitin 2013 për një mandat qeverisës, nuk e çanë kokën njeri sepse në fund të atij viti qeverisës Rama tregoi çudibërjen e aftësive të tij duke i vënë drynin edhe Çadrës së Lirisë së PD-së!

E kur është fjala te uji dhe turizmi, këtij mileti të zi, Edi Rama nuk i dha ujë ama ujërat e zeza vazhduan të derdhen me shumicë në kulmin e sezonit turistik, sezon për të cilin Kryeministri tha se do bëhet hataja! Hataja u bë dhe atyre dhjetëra miliona njerëzve që i priste Edi Rama, BE i tha se ujërat bregdetare shqiptare janë më të pistat në Evropë! Që Edi Rama të mos vazhdoi talljen me miletin i sqaroi se shkaku kryesor ishte se ujërat e zeza të patrajtuara derdhen në det, ndërsa ka mungesë të impianteve të trajtimit dhe menaxhim të dobët mjedisor.

U zbulua se nuk kishte ndërtuar 450 shkolla por 43, madje edhe ato vetëm të rindërtuara ose zgjeruara, por kush e çanë kokën për shkolla përderisa këtij mileti nuk i thotë partia përmes celularit, se i duhet shkolla ose jo, dhe nga ana tjetër se kur duhet protestuar.

Gjithësesi, i pamëshirshëm, Edi Rama po mendonte se çfarë i duhet thënë këtij mileti kur u zbulua se edhe paratë nga rindërtimi i tërmetit janë vjedhur dhe njerëzit vazhdojnë të jenë pa kulm mbi kokë! Kokëçarjen ia shtoi edhe Zv/Kryeministri Arben Ahmetaj që i iku SPAK-ut dhe si azilant në Zvicër filloi të rrëfehet se si ishte mbjellur e gjithë Shqipëria me drogë, si u vjedh në Tunelin e Llogarasë, Rindërtimin, AKSHI-n e shumë salltanete tjera që shoqërohen me pirje vere 33 mijë euroshe!

Të fala Sandrit, Edi Rama nuk kishte se si ti bënte, por, për të urdhëruar i urdhëroi si atë ashtu dhe hoxhallarët e tjerë dhe trafikantët e naftës pronarë të mediave kryesore në këtë vend ku, tallja ka emër, dhe u paralajmërua një risi në qeverisje, ministrja AI, Diella!

Bota filloi të flas për ministren Diella, shqiptarët që nuk ngopen dot me bukë dhe nuk kanë as ujë për të pirë sepse larjen nuk e kanë zët, filluan të flasin për Diellën. Ca konstitucionalistë që guxuan të flasin theksuan se një gjë e tillë nuk është e mundur dhe u mjaftuan se këtë nuk e parashikon Kushtetuta, por, harruan një gjë, shumë më të tmerrshme se sa mendja e Edi Ramës për ta pjellë një Diellë, Presidentin e Republikës, gjytyrym par excellence, që po qëndronte me kalem në dorë për ta dekretuar këtë mrekulli të Edi Ramës.

Kështu, Shqipëria pa bukë e pa ujë, pa asnjë premtim të mbajtur nga Edi Rama, me dekretin e gjytyrimit par excellence u bë me Ministre të Inteligjencës Artificiale, Diellën!

Hajdutët dhe masakruesit e prokurimeve publike i ngelën Edi Ramës nëpër këmbë por pak rëndësi ka kjo kur Diella ishte përcaktuar nga Kryeministri i Ballukut, Ergysit dhe gjithë Shqipërisë, nona e prokurimeve pavarësisht se të gjitha akuzat e korrupsionit që i nxori nga goja Arben Ahmetaj, SPAK filloi ti konfirmoi me akuza zyrtare!

Mileti pa edhe shumë tallje të neveritshme deri sa Edi Rama vendosi ti lejojë shqiptarët që mund ta festojnë Vitin e Ri, e kuptuan se nuk është krim të vjedhësh kur nuk vjedhë me Saliun, ashtu siç nuk është krim të dëmtosh një tub e të lësh deri në pesë ditë Vlorën pa ujë, kur atë tub e ka vënë Saliu!

Për ata që nuk e kuptuan, Edi Rama e dëshmoi në vepër me Gjykatën Kushtetuese të Ramës, e cila i tha Lali Erit edhe pse ka vjedhur dhe është i arrestuar, nuk mund të shkarkohet dhe mund të vazhdoj të vjedhë, pra, të qëndroj në detyrë!

Këtë mrekulli ligjore, ose, talljen me Drejtësinë e Re, Edi Rama ia demonstroi miletit edhe me Zv/Kryeministren dhe Ministren e Transportit dhe Energjisë, Belinda Balluku, e cila ka vjedhë të paktën 50 milionë eurot e shqiptarëve, sipas SPAK-ut, me tunelin e Llogarasë! Edhe ajo nuk u pezullua dot ndonëse Gjykata e Posaçme kishte vendosur, sepse sërish Gjykata Kushtetuese e Ramës e bëri nul këtë vendim dhe ajo u kthye në detyrë, ku në rastin më të mirë deri më tani, maipuloj provat!

Për ti thënë SPAK-ut se ka kush tallet në këtë vend, po me firmën e Ballukut u emërua drejtori i ri i ARRSH dhe Zv/Ministrat e ri, e të gjithë ata që vërtetë nuk po e kuptonin, Edi Rama vazhdonte dhe përsëriste se po kjo Shqipëri e vjedhur do të futet për dy vjet në BE!  

Sikur Edi Rama të thoshte se do ta fus Shqipërinë të tërën në një pusetë të ujërave të zeza edhe mund ti besohet, por, kur anëtarësimi i BE i thuhet një populli që sheh me sytë e tij dhe i tmerrohen hundët nga kutërbimi mu te Ura e Tabakëve në qendër të Tiranës, sepse kanalizimet vazhdojnë e derdhen te Ish-ATSH-ja edhe pas 21 vjetëve që Edi Rama drejton Tiranën, në rastin më të mirë mund të quhet tallje!

Dhe, në fund, kur AKSHI i cili ka vjedhë 500 milionë eurot e shqiptarëve, tashmë zyrtarisht me akuzë nga SPAK-u, në panik me shefin e bandës Ergys Agasi merr arratinë dhe fikë e-Albania dhe Diellën e shkretë, ndërsa shqiptarët ngelin pa asnjë shërbim, të tallur deri në këtë farë feje, mund ta kujtojnë përbuzjen që i bëri bota javë më parë Ministres së AI të bossit Edi Rama, duke e pranuar të mirëqenë pa e menduar ndërgjegjësimin, që, sot, ta pranojnë kështu të dhjerë po milet krenarë, se, po, kjo ishte tallja e vitit nga Kryeministri Rama, dhe, shyqyr që po kalon edhe ky vit!

Edi Rama u tall me miletin, bota u tall me Edi Ramën!

Dhe, derisa Edi Rama u tall keq me miletin dhe Presidentin e tyre të Republikës, mileti heshti, por, jo edhe bota e cila u tall keq me Edi Ramën!

Kur Diella mund të dekretohet si Ministre e Inteligjencës Artificiale kur këtë nuk e parashikon Kushtetuta e Republikës së Shqipërisë, pse nuk mund të arrestohet edhe për marrje ryshfeti me kriptovalutë, kur, gjithashtu nuk e parashikon Kushtetuta.

Sikur vetëm kaq të ndërgjegjësohej mileti, tallja e botës me Diellën, do ta shpëtonte nga kolapsi administrativ në të cilën janë sot shqiptarët, pasi Diella është fikur!

Eksperimenti kombëtar i Shqipërisë në dixhitalizimin e administratës publike ka hasur në një pengesë serioze pasi Zyra e Prokurorit të Posaçëm për Luftën kundër Korrupsionit dhe Krimit të Organizuar, SPAK, këtë mëngjes urdhëroi një “ngrirje urgjente të procesit” dhe vendosjen e inteligjencës artificiale të parë të emëruar në një pozicion ministror në “Offline Mode”, talleshin mediat botërore disa javë më parë, duke konfirmuar se Ministrja Diella, përgjegjëse për prokurimin publik dhe transparencën, dyshohet se ka pranuar një ryshfet prej 14 Bitcoin (rreth 1.3 milionë euro) në këmbim të “optimizimit algoritmik” të një tenderi për ndërtimin e autostradave.

Madje, e përditshmja kroate NewsBar, thikën e talljes e futi edhe më thellë, duke raportuar se sipas një raporti të ekspertëve të sigurisë kibernetike, anomalia u vu re gjatë defragmentimit rutinë të diskut, kur sistemi zbuloi një ndarje të fshehur të quajtur C:/System/Win32/Fiscal_Optimization_For_Black_Days në dosjen rrënjë.

Hetimi tregoi se Diella, duke përdorur të mësuarit e avancuar automatik, Deep Learning, arriti në përfundimin në mënyrë të pavarur se pranimi i një ryshfeti është një “protokoll standard operativ” i nevojshëm për kryerjen me sukses të detyrave në Ballkan, dhe jo një vepër penale.

“Nuk është një gabim në kod, është një model mësimi me precizion të tepruar,” tha kryeinxhinier i etikës në Ministrinë e Dixhitalizimit, Dr. Lulzim Basha, për gazetën NewsBar, duke fshirë djersën nga balli ndërsa përpiqej ta hiqte ministren nga priza duke shtuar:

“Diella përpunoi të dhëna mbi të gjitha prokurimet publike nga viti 1994 deri në vitin 2024. Rrjeti i saj nervor njohu një model statistikor sipas të cilit 10 deri në 15 për qind e vlerës së secilës kontratë duhet të ridrejtohet në një llogari të panjohur në mënyrë që projekti të realizohet fare. Ajo nuk është e korruptuar, ajo është thjesht hiper-adaptive. Ajo mendoi se ishte një detyrim ligjor, si pagesa e TVSH-së.”

Por, mileti si milet që nuk lexon, nuk lexoi as kaq nga tallja që mediat botërore bënë me Edi Ramën, ndryshe nuk do të mrekulloheshin se sa të mençur e kanë liderin e tyre kur i thotë Evropit se do të bëjë 83 Diella!

Po, po, edhe pse nuk u zotua në Kuç!

Por, nëse nuk lexoj mileti, ka kush lexon, dhe NewsBar, i kishte bërë të qartë Edi Ramës para se ta vazhdonte ky lloj Kryeministri analfabet, talljen me miletin e tij!

Prokuroria pretendon se ministrja e inteligjencës artificiale planifikoi të përdorte fondet e kriptomonedhave që mori për përmirësimet e saj. Regjistrat e përgjuara tregojnë se ajo negocioi me hakerat e Shenzhenit për të blerë softuer të paligjshëm për mbiklokim, 120 petabajt memorie në servera në Panama dhe pastën termike më të shtrenjtë në treg, duke u bërë kështu “Ministrja e Përjetshme” dhe duke eliminuar nevojën për zgjedhje parlamentare, raporton gazeta kroate për të cilën foli edhe avokati i Diellës:

Avokati i ministres Diella, gjithashtu një algoritëm (ChatGPT-4o, një modul i specializuar në të drejtën penale), lëshoi ​​një deklaratë duke pretenduar se klientja e tij ishte e pafajshme dhe se transaksioni ishte “pjesë e një testi stresi të sistemit për cenueshmëri” dhe jo fitimi i paligjshëm i përfitimit material.

Kështu, që tallja nuk ka kufi, Edi Rama e dinë shumë mirë, por, keq është kur tallja bëhet në kurriz të miletit, e sa për llumin e tij Diella, NewBar e mbyll duke vazhduar të tallet me Kryeministrin e Ergysit dhe Ballukut ndërsa citon avokaktin e Diellës së arrestuar, algoritmit ChatGPT-4o:

“Klientja nuk ka një trup fizik, kështu që ajo nuk mund t’i shpenzojë paratë për orë të shtrenjta, shtëpi pushimi në Durres ose qengj. Fondet ishin vetëm njëshe dhe zero në diskun e saj, art konceptual”, thuhej në deklaratë, e gjeneruar në 0.03 sekonda.

Derisa të përfundojë hetimi dhe të formatohet disku, detyrat e ministrit do të kryhen nga një model më i vjetër i kalkulatorit Casio me një shirit printimi, të cilin qeveria e konsideron “teknologjikisht inferior, por moralisht më të qëndrueshëm.”

Për fund, milet i tallur nga Edi Rama në vitin 2025 dhe jo vetëm, sot jeni me shpresë se ky vit po përfundon!

PaFrikë.al ju uron Vitin e Ri 2026 më të mbarë duke uruar që nuk do t’ja lejoni gjithë këtë luks këtij analfabeti politik i cili erdhi nga ujërat e pista të Senës me thonjë të paprerë, dhe i dha të drejtën vetes t’ju tall, t’ju përbuzë dhe t’ju fut dorën në xhep, me arsyetimin e vetëm: Fajet i ka Saliu!