Thirrje urgjente qytetarëve amerikanë, SHBA: Largohuni menjëherë nga Irani!

Departamenti amerikan i Shtetit ka lëshuar një paralajmërim urgjent për qytetarët amerikanë që ndodhen në Iran, duke i ftuar të “largohen menjëherë” nga vendi.

Kjo thirrje vjen pas përshkallëzimit të protestave në mbarë Iranin, rritjes së dhunës dhe bllokimit të aksesit në internet.

Në ditët kur Irani po hyn në javën e tretë të protestave antiqeveritare, grupet për të drejtat e njeriut dhe raportimet mediatike flasin për një situatë me qindra viktima dhe mijëra persona të arrestuar.

Autoritetet amerikane kanë theksuar se kushtet e sigurisë janë përkeqësuar ndjeshëm dhe se qytetarët e SHBA-së përballen me rreziqe serioze, përfshirë vështirësi në komunikim dhe lëvizje për shkak të kufizimeve të vendosura nga autoritetet iraniane.

Departamenti Amerikan i Shtetit e ka lëshuar këtë paralajmërim urgjent për qytetarët amerikanë në bashkëpunim me Ambasadën Virtuale të Shteteve të Bashkuara në Teheran, pasi SHBA nuk kanë ambasadë apo konsullatë në Iran, çka e bën të kufizuar ndihmën për qytetarët amerikanë në rast ndalimi apo emergjence. Veçanërisht shtetasit me shtetësi të dyfishtë përballen me vështirësi të mëdha për të marrë mbështetje konsullore nga autoritetet amerikane.